如果滿分係100分嘅話我會比海港薈200分。佢哋真係咩都可以有商有量，包括點樣分菜、點擺位全部都有得傾，亦都會盡量滿足我哋。🤩

負責嘅同事叫做Yoyo，佢即使放假都會交低我哋嘅case比其他同事跟進。結婚之前，佢哋仲俾我哋將10幾箱嘢擺去佢哋度先，日日有婚禮都肯遷就我哋，真係唔話得。

當日嘅食材好新鮮，唔少賓客都話幾好食。👍🏼至於員工方面睇得出全部都有專業訓練，唔係酒店嘅炒散，不過有賓客反映12人枱就比其他地方細。🤔

因為我先生之前喺海港薈飲過，覺得啲嘢食好食，咁喺差唔多結婚嘅時候我哋去睇咗好多場地，先一齊去到海港薈，覺得佢嘅場地夠開揚，四四正正又夠大，可以擺好多圍數，我本身唔係擺好多圍所以就好闊落。同埋因為佢喺尖沙咀所以有個對住維多利亞港嘅好靚嘅海景，本身嘅decoration好新好靚，唔會好沉悶，仲有個新娘房都好正，所以最後就揀咗喺佢哋度擺酒席啦😊。

我哋上去睇場嘅時候係平日夜晚，本身已經有人喺度食飯，佢都任我哋喺度自己參觀，唔會限制我。我平時主要係同經理Sunny同Yoyo溝通，有咩要更改修正都係同佢哋傾，佢哋服務態度好好，我睇場嘅時候佢哋已經試開個螢幕俾我睇，個mon好大，同埋如果有需要嘅話仲可以試播埋個音響，但係我就無要求啦。之後佢即時俾咗啲package嘅leaflet我睇，解釋得好詳盡，仲話如果唔即時join，去到婚展join都會有唔同嘅優惠🤓。

我本身係開廿一、廿二圍，但係因為疫情我最後就淨係開咗十五圍，所以cut咗六圍，佢哋有三圍唔收錢，另外三圍就俾我存菜，可以hold半年去食返，存菜有返少量嘅手續費，不過都係合理嘅。因為我有朋友cut圍數係無得食返，最多係減咗少少min charge但係都要照俾，但係海港薈原本嘅min charge唔高，同埋有得俾我cut圍數同存菜，處理得好彈性，好為新人著想🥰。

我無用到佢本身個臺，而係自己起咗個另外嘅backdrop，我同deco公司上去度牆起backdrop，前後上咗去兩次，第一次係我妹妹同佢男朋友上去度，我無事先預約到，淨係上去前幾個鐘whatsapp同返Yoyo講咗先，Yoyo嗰日係off嘅，佢話可以自由上去同返Sunny講就得，好配合我哋。第二次上去Yoyo就喺度，嗰日係有人擺wedding嘅，四點就要交場俾人，我哋四點幾五點先去到，但係佢話唔影響到其他人就ok，中間佢都有過嚟配合我話俾我聽之前度過大約嘅size，我再同返deco公司傾。

去到Big day，Yoyo都係全日跟著我，我有需要就彈出嚟幫我，真係好幫到手😚。因為我媽媽係食素嘅，佢有啲朋友都係食素，就開咗三圍齋for其他人食。嗰三圍其實仲有空位剩嘅，我媽媽坐主家席，唔會坐喺食齋嗰啲圍數，咁我就request Yoyo一定每一碟都要分開上俾我媽媽，呢樣好好👍。

March in嗰陣平時應該係由後面嗰度行上嚟，但係因為我依家set咗個backdrop喺中間，就會新娘房一出嚟就march in，所以Yoyo有同Sunny夾咗搬咗個射燈區去最後面，就可以射去本身嘅臺前，照住我行出嚟。佢哋會按我嘅需要去安排，本身佢都話有一定嘅困難，但係最後同MC夾完就幫我哋搬咗個射燈，好盡量配合到我哋👍🏻。

不過佢哋嘅菜單得三個選擇，如果可以多少少選擇就更加好啦。啲賓客都讚啲嘢食好食，特別係個湯好好飲，我當日無食到，但係佢哋有pack返俾我，我返屋企叮咗嚟飲，真係好飲啊😋。我已經介紹咗朋友去海港薈嗰度睇場啦，佢哋可以辦到啲中小型嘅婚禮，同埋個場嘅自由度好大，所以我覺得傾向西式婚禮、唔會太多圍數同想揀自己鍾意嘅decoration嘅新人就好適合啦🥳。