我十年前嘅婚紗相已經係搵Ocean Wedding幫我哋影，覺得佢哋嘅相有質素，所以好信任佢哋😇。依家上網search返見到佢哋原來搬咗位置，有自己影相嘅室內studio，因為我比較鍾意喺室內影相，同小朋友影都方便啲，所以就聯絡返佢哋影家庭相啦😆。

佢哋嘅package就包埋租衫同化妝set頭，小朋友衫係我自己帶去，我嘅婚紗同先生嘅禮服都係佢哋提供，啲款有好多可以選擇，咁樣嚟講個價錢好公道👍🏻。其他公司嘅家庭相通常限影四個人，每多一個人就要加錢，但係佢哋好好嘅一樣嘢就係唔限人數，我仲可以帶埋姐姐一齊去影。我哋去影嗰日係平日，我個女就放三點幾，佢喺油麻地返學，再坐車過到去都要一段時間，未必咁準時到，所以我就同個化妝師話我個女大概四點半前到，可唔可以等下佢，幫佢set下個頭呀。化妝師好好，唔會話一化完就走，都等埋我個女女嚟，set埋頭佢先走，安排得好彈性。

佢哋studio雖然唔係好大，但係都有唔同嘅佈景影，係我哋心水嘅場景，有啲波波會啱小朋友，佢哋就最開心啦，又有啲簡單啲嘅，譬如一張靚梳化咁，都影到張好靚嘅相出嚟啦🥳。攝影師同嗰度嘅職員對我嘅兩個小朋友好warm好貼心，好似一班人喺度玩緊咁，令到小朋友易啲投入，影出嚟就會自然啲。同埋原本係影一個鐘嘅，但係攝影師見我哋有小朋友，就話送多咗半個鐘俾我哋，最後佢見我哋影得咁開心，仲差唔多影咗兩個鐘，唔會催我哋，又唔會同我額外收費🥰。出面好多攝影公司都係要後期製作出嚟令到張相好靚，但第一輪同我哋影咗百幾張相，收返啲相真係未執已經好純好靚，我哋好鍾意啊😍。

如果佢哋可以有埋小朋友嘅禮服就更加好啦，雖然我都明佢哋可能會擔心提供嘅禮服未必啱哂全部人，但係佢哋有少少喺度嘅話都方便我哋，就唔洗特登去買啦🙈。同埋仔依家讀幼稚園，出年就畢業，我都有問佢哋有無幫小朋友影畢業相，不過佢哋就話無嘅，我就提出佢哋嘅價錢都唔貴，如果可以影埋畢業相，俾到個價錢我，咁我都可以問下啲家長，啱嘅話就可以安排下啦。佢哋真係有聽我呢個建議，兩日到就俾咗個大約嘅報價我，介紹埋有咩服務同影幾多個鐘，仲話啲畢業袍佢哋都可以安排到，真係好快好上心😙。