我哋係2018年8月開始搵場地，咁啱喺Facebook見到海港薈，嗰陣佢啱啱開咗一兩個月，我哋就直接上去睇場。接待我哋嘅經理介紹嘅好清晰，可以答到我想問嘅嘢，又唔hard sell。而且佢嘅地點好方便，喺北京道一號，上到去覺得佢哋個場真係好新淨同開揚光猛🤩。樓底比我哋想像中高，裝修俾我哋感覺係有別於一般酒樓嘅，會比較high class啲，所以就揀咗喺佢哋嗰度證婚同擺中式晚宴啦😆。

本身一開始接觸嘅經理離咗職，所以同之後跟我哋wedding嘅經理係兩個人嚟嘅，新嘅經理跟得好好，例如座位表有啲改動，佢會好主動聯絡我哋，會幫我哋諗埋，呢一點真係好好🥳。Big day當日會有個同事貼心跟住照顧我，我有任何嘢搵佢，佢都會幫我處理妥當，跟得好足。我嗰日係早過預定時間上去嘅，佢哋就算未set好個場都好歡迎我哋，幫我哋安排好啲嘢。

仲有一樣嘢都要特別讚一讚佢哋👍🏻，因為big day嗰排有啲社會運動，尖沙咀影響比較大，所以我事前一個月已經不停煩個經理，佢哋都好好咁幫我諗好多可行嘅方案，譬如如果尖沙咀嘅交通block晒，圍數就可以點樣處理，又分享返之前有啲新人遇到咁嘅情況會點做，會不厭其煩咁答我嘅問題🥺，最後好好彩嗰日係好平靜嘅，我哋可以順利進行到個婚禮😇。

嘢食方面係好主觀嘅，不過我聽返有啲賓客話好好食，都有啲賓客本身食得健康啲，就會覺得啲嘢食偏鹹啦。大家都有讚個場地好靚，感覺好grand🥰。我未擺酒之前已經介紹咗海港薈俾兩pair新人啦，其中一pair仲啱啱喺1月擺咗。我覺得佢哋嘅場會比較適合budget有限嘅年輕人，因為坦白講依家擺酒洗費都好大，所以如果budget唔係預好多嘅話，海港薈係一個好好嘅選擇🤓。我覺得呢個價位佢哋已經俾咗超乎想像嘅嘢我啦，性價比真係好高👍🏻。