我哋十月一號擺酒，當初揀場地嘅時候想睇煙花，所以想搵啲對住維港嘅，覺得尖沙咀又方便，機緣巧合見到海港薈符合晒呢啲條件。之後有日同屋企人去咗海港薈飲茶，飲完就順便一齊落去望下啦。一去到睇到已經好鍾意啦😍，佈置比較符合我嘅心水，光線又好，最緊要係性價比好高，屋企人都覺得好，所以最後就揀咗喺佢哋嗰度擺中式晚宴啦😆。

睇場介紹嘅時候啲職員介紹得好清晰，好多嘢講完都會寫低，係白紙黑字，唔會有啲隱藏消費嘅。因為我哋喺十月一號擺，交通上可能會比較麻煩，好多嘢要準備好啲應變措施，佢哋處理得好快，同埋有啲圍數擺唔晒佢都可以俾我哋攞返，好彈性🤓。

最好嘅係負責嗰個經理，全程都跟住我，見我有咩需要就即刻出嚟幫我，好貼心。另外，新娘房好大，有埋梳化，仲可以望埋海景添，攝影師、媽咪奶奶同姐妹入晒嚟休息都夠位，硬件方面好好👍🏻。佢哋最勁嘅地方係就算我有陣時無約時間咁樣上去都可以即刻嗌得出我個名，可以感覺到佢哋好上心。

雖然期間負責我哋嘅同事有轉過，我哋一開始都有少少擔心，不過最後佢哋都做得好好。因為嗰日有社會運動會比較尷尬，大家都趕住走，佢哋會安排好要點樣走同交通車位嗰啲，好抵讚。賓客feedback返都話啲嘢食好食同夠熱，送嘅餐前小食都好好食😋，有啲點心同乾炒牛河咁，呢一點好貼心，因為嗰日有賓客早咗嚟，但係出面嘅情況咁混亂都唔想離開，淨係坐喺度又唔知做咩好，所以佢哋送埋呢啲小食就啱啱好啦。突發情況佢哋都可以處理得好好，整體我哋好滿意啦，真係估唔到咁好🤩。

但係佢哋始終係酒樓，其他同事嘅service再做得足啲就更加好啦，譬如斟茶遞水方面就可以再注意下。不過佢哋以咁樣一間酒樓嚟講性價比好高🥳，我已經介紹佢哋俾啲朋友啦，如果唔想煩啲deco嘅朋友就可以考慮下佢哋啦，因為佢哋嘅deco已經set up好晒，場地光猛，交通又方便，大家出入都好，樓下有停車場又方便埋揸車嘅賓客，好適合圍數唔係太多嘅新人啦。