海港薈 (尖沙咀北京道一號)
Victoria Harbour Supreme (One Peking Road)
4.8

客戶評語

Quxxn.queen Hui
4.5
精選評語
服務 / 婚宴日期: 2020.02.07
因為我先生之前喺海港薈飲過,覺得啲嘢食好食,咁喺差唔多結婚嘅時候我哋去睇咗好多場地,先一齊去到海港薈,覺得佢嘅場地夠開揚,四四正正又夠大,可以擺好多圍數,我本身唔係擺好多圍所以就好闊落。同埋因為佢喺尖沙咀所以有個對住維多利亞港嘅好靚嘅海景,本身嘅decoration好新好靚,唔會好沉悶,仲有個新娘房...

因為我先生之前喺海港薈飲過,覺得啲嘢食好食,咁喺差唔多結婚嘅時候我哋去睇咗好多場地,先一齊去到海港薈,覺得佢嘅場地夠開揚,四四正正又夠大,可以擺好多圍數,我本身唔係擺好多圍所以就好闊落。同埋因為佢喺尖沙咀所以有個對住維多利亞港嘅好靚嘅海景,本身嘅decoration好新好靚,唔會好沉悶,仲有個新娘房都好正,所以最後就揀咗喺佢哋度擺酒席啦😊。

我哋上去睇場嘅時候係平日夜晚,本身已經有人喺度食飯,佢都任我哋喺度自己參觀,唔會限制我。我平時主要係同經理Sunny同Yoyo溝通,有咩要更改修正都係同佢哋傾,佢哋服務態度好好,我睇場嘅時候佢哋已經試開個螢幕俾我睇,個mon好大,同埋如果有需要嘅話仲可以試播埋個音響,但係我就無要求啦。之後佢即時俾咗啲package嘅leaflet我睇,解釋得好詳盡,仲話如果唔即時join,去到婚展join都會有唔同嘅優惠🤓。

我本身係開廿一、廿二圍,但係因為疫情我最後就淨係開咗十五圍,所以cut咗六圍,佢哋有三圍唔收錢,另外三圍就俾我存菜,可以hold半年去食返,存菜有返少量嘅手續費,不過都係合理嘅。因為我有朋友cut圍數係無得食返,最多係減咗少少min charge但係都要照俾,但係海港薈原本嘅min charge唔高,同埋有得俾我cut圍數同存菜,處理得好彈性,好為新人著想🥰。

我無用到佢本身個臺,而係自己起咗個另外嘅backdrop,我同deco公司上去度牆起backdrop,前後上咗去兩次,第一次係我妹妹同佢男朋友上去度,我無事先預約到,淨係上去前幾個鐘whatsapp同返Yoyo講咗先,Yoyo嗰日係off嘅,佢話可以自由上去同返Sunny講就得,好配合我哋。第二次上去Yoyo就喺度,嗰日係有人擺wedding嘅,四點就要交場俾人,我哋四點幾五點先去到,但係佢話唔影響到其他人就ok,中間佢都有過嚟配合我話俾我聽之前度過大約嘅size,我再同返deco公司傾。

去到Big day,Yoyo都係全日跟著我,我有需要就彈出嚟幫我,真係好幫到手😚。因為我媽媽係食素嘅,佢有啲朋友都係食素,就開咗三圍齋for其他人食。嗰三圍其實仲有空位剩嘅,我媽媽坐主家席,唔會坐喺食齋嗰啲圍數,咁我就request Yoyo一定每一碟都要分開上俾我媽媽,呢樣好好👍。

March in嗰陣平時應該係由後面嗰度行上嚟,但係因為我依家set咗個backdrop喺中間,就會新娘房一出嚟就march in,所以Yoyo有同Sunny夾咗搬咗個射燈區去最後面,就可以射去本身嘅臺前,照住我行出嚟。佢哋會按我嘅需要去安排,本身佢都話有一定嘅困難,但係最後同MC夾完就幫我哋搬咗個射燈,好盡量配合到我哋👍🏻。

不過佢哋嘅菜單得三個選擇,如果可以多少少選擇就更加好啦。啲賓客都讚啲嘢食好食,特別係個湯好好飲,我當日無食到,但係佢哋有pack返俾我,我返屋企叮咗嚟飲,真係好飲啊😋。我已經介紹咗朋友去海港薈嗰度睇場啦,佢哋可以辦到啲中小型嘅婚禮,同埋個場嘅自由度好大,所以我覺得傾向西式婚禮、唔會太多圍數同想揀自己鍾意嘅decoration嘅新人就好適合啦🥳。