最初認識Oliver嘅契機係我嘅化妝師，化妝師之前喺佢朋友嘅婚禮上面認識咗Oliver，了解之後覺得係一個幾唔錯嘅MC，所以見我仲搵緊人選就推介比我。當然自己都有做過research，但係網上嘅片段其實我都唔係好相信，所以都希望可以從認識嘅人口中得知評價，相信會穩陣啲。😂

喺真正接觸Oliver之前，我已經拜託化妝師去問Oliver攞資料，係好詳細好清楚嘅。而令我對Oliver第一印象爆燈嘅位，其實就係佢同我接觸之後，佢再重新send多次資料俾我。佢希望確保中間冇任何嘅誤會或者溝通出錯。即使我之前已經through化妝師攞資料，但佢都依然希望做到零失誤，減少不必要嘅誤會。我覺得溝通喺籌備婚禮上係最key嘅一環，而佢係依方面比到好大信心我。🥰 喺傾談嘅過程當中，Oliver好樂於比意見。

近一兩年搞婚禮同以前嘅流程有唔少改動，例如以前合照嘅時候又點會考慮要唔要除口罩呢，所以真係幾需要一個有經驗嘅人引導同幫助我地。Oliver嘅經驗係足夠去處理呢啲事情。喺前期功夫佢做得好仔細，會預計埋March in有機會發生嘅事件，預早同我講有啲咩解決方法。Oliver會預計買若然delay可以講咩填補時間，佢問過我有冇說話想同賓客朋友講。佢話佢自己會額外準備一啲說話，但係因為婚禮嘅主角係我同先生，賓客最想了解嘅就係主角嘅故事。如果由我哋準備，親切度會高好多。💞

Oliver好尊重我同埋長輩，影相嘅時候，因為我同媽咪事前冇溝通得清楚，導致有少少誤會出現，但係Oliver即場安排改動。另外場外有咩突發情況，Oliver都會即時入新娘房同我report，等我知道出邊發生緊咩事。你成個婚禮進行嘅期間Oliver都幫我哋影咗好多花絮，由於佢企喺台上面，所以個角度係完全唔同，係好另類嘅感覺。🤩

喺婚禮結束左之後Oliver佢好用心機寫咗一段長文俾我同先生，同我講返喺佢嘅角度中當日嘅婚禮究竟係點樣進行嘅。佢講咗啲好窩心嘅說話，稱讚我同先生當日嘅表現。佢都好留意當日賓客嘅微表情，會話俾我哋聽係我哋講嘢嘅時候有啲賓客眼濕濕。由Oliver種種嘅舉動都可以話到俾我聽係一個好敬業嘅MC，我嘅選擇真係冇錯。😘