天澄閣一開始最吸引我哋嘅係個樓底好高，成個感覺都好開揚又好舒服，而且講解得好清楚👍，就返我哋budget同情況，都傾得好舒服😁。我哋之前都去四季同嘉里嗰邊睇過場，但可能因為我哋預算15至18圍左右，去其他場地就比較尷尬🙈，都得啲比較細／無窗／完全無佈置嘅地方，同天澄閣個對比就好大😆。我哋睇完場之後同屋企人講開覺得幾好😉，嗰時先知原來媽媽朋友識個喺天澄閣做咗好多年嘅員工，就更加覺得唔使再諗🥰，就揀咗天澄閣。

其實我哋原本係7月17號搞婚禮，點知我同太太竟然7月16號確診咗！我即刻打俾佢哋同事Terry，佢一聽電話嗰時仲話「周生聽日見啦😉！」，我就同佢講「聽日見唔到啊！我哋確診咗啊🥲！」，打去嗰吓其實都覺得好尷尬，因為我自己都覺得如果我哋早一個星期要改都話人之常情，但係早一日可能佢哋已經預備晒啲食材，將心比己我自己開婚宴場地嘅話我都會覺得好大鑊。我直頭都唔敢問會唔會唔使收錢，最多都諗係加幾多可以處理到，但係佢哋竟然肯幫我哋改時間仲＄１都無收過我哋🤩！對我嚟講真係好震撼，好誇張，我講比啲friend聽佢哋都唔信🤣！ 後來我哋改時間，得返30/10 或24/12，我哋又唔想阻住其他人過聖誕，就揀咗30/10，不過因為教會嗰邊30/10唔得，結果我哋就29/10教會早上婚禮，30/10 住hyatt＋bridal shower，30/10先再出門，然後去天澄閣度斟茶同攞婚宴😏。

講返婚宴，覺得佢哋嘅員工都好好，我哋以為唔見咗對手鐲，現場佢哋都好上心咁幫手搵🥰。結果原來係套咗喺另一隻手鐲下面，可能係戴嗰時太緊張就冇留意😆，都好感謝佢哋好認真咁幫手🙏🏻。流程方面，MC阿Roy都係天澄閣嗰邊幫我哋安排，佢都同我哋傾得好仔細💯，當日都好順利👍。特別想讚跟新娘嗰個員工阿lu好細心❤️！例如會成日同我太太講「新娘子你坐吓休息多啲，飲多啲暖水啦」，蛋糕都有幫我哋keep住留俾我哋食😍。敬酒嗰時又一直跟住攞住條裙，每一張相都幫會拉返好條裙，令我太太好放心🥰。除咗擺好條裙，敬酒時又會炒熱啲氣氛💪🏻，叫大家一齊敬酒。最尾我哋唔想浪費食物，就請佢哋幫我哋包走啲食物，不過結果包得俾我哋想像中少。整體嚟講成個婚宴氣氛都好好👍，食物同環境朋友都一致好評💯！