之前朋友嘅婚宴有請The Clover表演，所以都欣賞過佢哋嘅演出，覺得佢哋都幾專業，同埋好會帶動現場氣氛。我哋都冇特登上網去睇佢哋嘅評論，反而係有喺網上睇過佢哋嘅演出片段，都覺得佢哋嘅演繹風格好啱我哋，所以就揀咗The Clover嘅團隊喺我哋嘅婚宴上表演。

同佢哋溝通嘅時候，佢哋嘅同事都好有helpful，同好樂意去解答我哋嘅問題，而且解答得好清晰。至於歌單方面，樂隊都會事先了解我哋鍾意嘅風格，都有同佢哋提過想要soft啲嘅歌，佢哋亦都會圍繞住我哋嘅要求，推薦返啲柔和嘅歌比我哋，整個揀歌單嘅過程都好smooth。

婚禮當晚，The Clover 樂隊就安排咗一個主音同埋五個音樂手俾我哋。佢哋團隊都提早到場做彩排，仲帶咗好多樂器試音。佢哋整晚足足唱咗四個鐘頭，總共有三十幾首歌，全程都表現得好專業，準備得十分充足。有一part我想特別分享下，我哋當晚臨時加咗一首歌，佢哋樂隊都可以即場演出，太厲害，樂隊臨場反應好靈活，又會盡力去滿足我哋嘅要求。而樂隊成員之間好有默契，整個表演時間都夾得好好，在場嘅親戚朋友大家都好投入，現場氣氛好熱鬧！