當時我都有比較過其他場地，但最後選擇咗天澄閣，最主要原因係佢個場地冇柱，咁就唔會阻住賓客嘅視線，全部人都可以睇到成個台。仲有一樣吸引我嘅係佢個樓底夠高，唔會令人有壓迫感😆。當時去睇場同溝通，我覺得天澄閣嘅服務都唔錯，如果有問題問佢哋，同事都會詳細解釋。至於menu方面，天澄閣俾咗幾個plan我揀，有唔同價錢同菜式選擇。如果想改其中幾個餸，佢哋都俾我哋改😚。不過新娘房就細咗啲，當日我喺嗰到換衫同化妝，加埋有親戚一齊化妝，空間上就有啲逼。如果新娘房可以大少少，或者有個專門嘅化妝區，就會好啲。

天澄閣啲服務唔錯，尤其係佢哋嘅同事態度親切，不過喺佢哋offer嘅裝飾優惠方面，提供嘅選擇比較單調，主要係布藝設計，如果多啲變化嘅話，效果會更加高級😚。另外，天澄閣有一點值得稱讚，當晚因為有啲親戚臨時冇嚟，結果發現有一圍淨係得六七個人坐，但當時已經係差唔多七點幾，我哋問天澄閣可唔可以cut一圍，佢哋竟然話可以🥹！雖然嗰圍已經有兩個餸煮咗，但其他嘢都可以取消，佢哋仲俾返錢我哋。呢個安排真係好貼心，因為唔係每個場地都會接受咁臨時嘅更改🥲。另外，無論係前期溝通定係當日安排，都做得好好👍。同事會主動提醒我哋一啲細節，例如可以提前一日送啲酒、西餅過去，又建議我哋自己準備麻將或者啤牌俾賓客，因為佢哋嗰啲會比較貴😚。雖然當日中午天澄閣都有其他新人擺酒，但同事俾我哋喺前一天擺低啲物資，又會幫我哋點算清楚，交代返俾我聽，令我覺得好安心💕。