我哋揀Hyatt Centric Victoria Harbour ，因為我哋都好鍾意 Hyatt 集團嘅風格，所以喺網上搵咗幾間場地做比較，最後覺得呢到最符合我哋嘅要求。Hyatt Centric Victoria Harbour 嘅場地規模啱啱好，唔會太大，而戶外證婚場地同成個場嘅設計都幾貼近我哋想要嘅感覺。我哋去睇場嘅時候，已經覺得裝修好靚，唔需要再額外deco，呢點真係好好😋。喺同酒店溝通嘅過程中，佢哋嘅回覆速度真係好快，無論係查詢或者改menu， 佢哋都好快俾到回應，仲俾專業建議我哋。例如喺 menu 方面，我哋改咗幾款菜式，將魚生換成其他小食，主廚都好樂意配合😚。同事之前都有提醒過，但有一樣嘢食我哋估唔到真係會咁辣，結果當日有啲朋友覺得太辣，所以如果有講得更清楚就會更加好。但係成個過程當中，同事都有keep住問我哋有冇食物敏感，或者有冇啲咩要求🥳。

當日場地嘅光線唔錯，尤其係出門房嗰到，兩邊都係落地玻璃窗，令間房夠光猛🤪。房內空間都足夠，但因為有啲茶几同櫈，如果想要多啲空間，就需要花啲時間移動。酒店同事非常細心，佢哋留意到我哋冇時間食嘢，送嘢飲嘅時候仲俾埋飲管我哋💖。同事仲幫手將剩低嘅嘢食打包，方便我哋帶返屋企。呢啲細節雖然唔算好大嘅舉動，但真係幾窩心🥳。