一直溝通都覺得Fantasy Concept團隊俾人嘅感覺比較可靠，同埋展示出嚟嘅作品都幾啱我哋心水😗。同佢哋溝通嘅過程都幾順利，我哋問嘅問題佢哋都可以好清楚咁解答，而且會根據我哋嘅諗法作出調整同提供建議。拍攝前，佢哋都會主動了解我哋嘅要求，所以到正式影相嗰日，其實大家已經有一定共識，做起上嚟都會順利好多😚。到拍攝當日，我覺得攝影師同化妝師都幾細心，而且全程跟得好貼。例如換衫、補妝，甚至去洗手間呢啲細節位都有人照顧到，感覺幾貼心。攝影師本身都幾風趣，會主動帶動氣氛，又會教我哋點擺pose，所以影相嘅時候唔會覺得尷尬或者緊張，反而可以更自然咁互動，所以啲相會比較有趣！另外，佢哋成個團隊都配合得幾好，做嘢有條理之餘效率都高。由揀衫、影相，到後期執相、 整相簿同相架，成個流程都好順暢，而且俾相嘅時間都幾準時，唔需要我哋特別催🙌🏻。加上Fantasy Concept俾我嘅感覺幾老實，唔會刻意推銷多餘嘅嘢，而係按我哋需要去建議適合嘅選擇，呢點我覺得幾安心。 拍攝地點方面，我哋本身只係有個大概嘅想法，例如想去石澳影，但實際邊啲位好睇，其實都係攝影師幫我哋揀同負責帶路，最後出嚟效果都幾理想。收到成品之後，啲相嘅風格同我哋嘅expectation都幾接近，質素都幾好！我對佢哋嘅服務都幾滿意，由前期溝通到拍攝，再到後期製作都算穩定同有水準，而且價錢我覺得都合理👍！