揀婚宴場地真係要考慮好多因素，最後我哋揀咗紅磡天澄閣，真心覺得揀啱！

一開始我哋篩選場地嘅時候，最緊要係地點方便賓客。天澄閣喺紅磡，揸車去好方便，泊車位又多，搭巴士都好方便，就算搭地鐵都只係行少少，絕對係可接受嘅範圍。之後我哋睇食物質素，上網睇過啲feedback都幾好，仲特登去試食過晚市中菜，水準好穩定。

場地環境方面，佢樓底高，我哋擺十零圍都覺得好舒服，個空間感好好又唔迫。最正係佢有個室內園林証婚空間，唔使行出行入搵戶外位影相，又唔使擔心天氣因素，咩都喺室內搞掂，超級方便！連新娘房同賓客洗手間嘅裝修都好整潔，呢啲配套細節我哋都好滿意。

簽約之後，團隊服務態度依然好nice！宴會經理Ruby好積極同我哋夾，又會主動提我哋要準備同處理啲咩，有問即答，畀咗好多專業意見我哋。宴會當晚仲要讚一讚Chris同埋照顧新娘嘅Lu姐，我哋玩小遊戲遇到技術問題，Chris即刻幫手處理，應變能力一流！Lu姐照顧新娘子非常細心，令佢唔會緊張，仲會關心我哋，真係好窩心。

另一半都話非常之好，讚賞大家處理問題嘅能力，賓客都食得好開心，場地環境獲得一致好評！如果可以改善嘅話，希望將來可以申請寵物友善牌照，同埋將証婚位置改成可開合嘅半開放空間，咁就更加perfect啦！

整體服務我哋畀4.5分，極力推薦紅磡天澄閣！