閨蜜出嫁了，做姊妹嘅一定想好好幫手！但其實做姊妹要兼顧好多嘢，一啲都唔容易！今次編輯部就整理咗一個「姊妹團終極懶人包」，內附金器整理貼士、姊妹任務清單、揀姊妹裙貼士同姊妹團Posing Ideas，所有資料一文盡覧，一次過解答姊妹們心中疑問！
撰文：婚享會編輯部｜圖片來源：Mr.L Photographers、Ocean Wedding Service、網上圖片
必讀！金器整理5大重點！
大日子當日新人會收到唔少金器～ 為咗確保金器能夠喺短時間之內記錄、整理妥當，新人同好姊妹都必讀以下5大貼士！
1/ 預備Checklist ＋ 貼Label
大家可預先問定新人屋企人有邊位長輩要飲茶，越詳細越好，然後準備好金器記錄表，當日就可以mark清楚每件金飾款式、數量、送禮人、贈送時段、牌子等，想mark得再清楚啲，可以預備較細張嘅Label，貼入金器盒之餘又可以貼埋喺龍鳳鈪入面，咁就一目了然啦！
2/ 拍下敬茶合照＋金器close up
各位姊妹亦可以用手提電話／相機做記認，當新人喺敬茶時收到金器，即可以幫手影兩張相：一張係敬茶合照，另一張係金器close up，之後自然可以睇相認金器啦～
3/ 囍字向出～ 拍攝效果更好！
無論擺好金器俾攝影師影，又或者新人戴住金器影相，都要記住囍字要向出，咁樣影出嚟會更靚！
4/ 準備紅繩、透明膠紙
大家記得要準備紅繩，以防金器太多可以綁埋一齊～ 而且仲要有透明膠紙，前後將金鐲扣位置貼實，可防止金鐲扣鬆脫之餘亦唔礙眼！
5/ 找負責任好姊妹幫手！
最後，當然要有負責任嘅好姊妹幫手執行任務！負責嘅姊妹一定要信得過＋有責任感＋膽大心細，有經驗嘅當然更好，可以令你放心享受婚禮！
姊妹任務清單！
做得新娘姊妹嘅都係閨蜜，當然想自己可以好好幫到手！細心留意以下12大重點，做好婚禮任務，令新娘留下美好回憶！
1/ 好好管理人情、禮物、斟茶利是
被安排坐接待處嘅姊妹，收人情時記住要檢查對方喺利是上有無寫自己名～ 如果無嘅話，亦要禮貌地提醒賓客，問對方係男家定女家親友？貴姓？而且記住「人情」同「斟茶利是」要分開，仲要記錄得清清楚楚～
2/ 看管金器首飾
姊妹除咗要幫新娘換衫之外，仲要幫新娘配戴、點算同存放首飾金器，親力親為，令新娘放心！
3/ 細心保管新娘物品
時刻保管好新娘物品，檢查好現場有沒有遺留物品，清楚每樣東西擺放位置。特別貴重嘅物品如對戒、金器等，應該交俾一位專門保管貴重物品嘅姊妹。
4/ 時間管理
姊妹亦可幫手管理婚禮流程，包括吉時提醒、按時證婚、在指定時間內完成佈置，仲有同主人家了解開席與否等等。
5/ 清楚流程、聯絡人
確認婚禮當天流程，了解清楚各個工作人員嘅詳細名單同聯繫方式。
6/ 佈置房間
細心佈置房間，貼上喜字貼，令攝影效果更好。
7/ 新娘的穿搭專員
幫新娘穿婚紗，安排每件婚紗、禮服嘅首飾同婚鞋配搭。
8/ 協助舉行重要儀式
接新娘、敬茶時安排妥當，細心拹助每一項重要儀式。
9/ 隨時準備紙巾！
儀式上提前準備好戒指盒，仲有更重要嘅係：紙巾！喺新娘準備喊嘅時候立即遞上，仲有時刻準備清水同飲管，令忙碌嘅新娘都可以飲水而唔整花唇妝，更顯窩心。
10/ 令現場氣氛更熱鬧！
每個重要時刻，好似新人進場、錫錫、敬酒等環節，都需要兄弟姊妹團歡呼搞氣氛，令各位賓客更加投入！
11/ 照顧四大長老
四大長老可能唔太熟婚禮流程，為咗令佢哋更加安心，可以安排姊妹喺四大長老換衫同準備上台嘅時候，照顧同提點佢哋。
12/ 宴後幫手清場！
婚宴完成後，姊妹當然唔好即刻換衫走人，可以協助新人換衫送客、執物資，當賓客都離開之後，就將新娘房物資好好送上酒店房或新人車。
揀姊妹裙3大原則！
姊妹係婚禮上嘅重要幫手，而且經常會一齊影相，所以揀姊妹裙都好重要！ 但係點樣先可以滿足唔同姊妹嘅需要？點先可以襯到自己嘅婚禮／婚紗？只要按以下3大原則去選姊妹裙，自然可以同姊妹一齊靚到底，為婚禮加分！
1/ 姊妹裙色系
顏色係好重要一環，B2B喺考慮姊妹裙色調時，最重要千祈唔好同自己嘅裙撞色，亦要考慮婚禮佈置主題、早上出門場地、行禮場地、晚宴嘅reception同 backdrop主色等，建議可以著上同婚禮場地有稍微對比顏色嘅裙，同時亦要顧及伴郎兄弟團嘅服裝顏色。雖然粉嫩嘅顏色好靚，但一般正粉紅、正黃色呢類顏色只有皮膚白嘅女仔先Carry得到，其實姊妹裙唔一定要鮮艷先好睇，不妨考慮豆沙色、霧灰藍色等帶點灰調嘅色調，同樣可以帶出仙氣。
2/ 姊妹裙質料
質料方面，亦最好配合婚宴嘅主題／婚紗嘅風格，若果整體感覺係比較仙氣嘅，姊妹裙不妨都選擇一啲紗裙／Lace嘅款式；如果整體感覺比較高雅，就可以加一啲珠片點綴～
3/ 姊妹裙款式
每個姊妹都有唔同喜好、身型，為減低成本，同時滿足姊妹要求，不妨選用「同色不同款」嘅方法，姊妹裙嘅款式亦不宜太性感，實用而美觀嘅款式就最好不過！近年越嚟越多姊妹鍾意輕鬆著上一條型格連身褲，走動方便之餘，亦不失華麗感！而且揀款式時都要配合婚禮場地，好似而家越嚟越流行戶外或海灘婚禮，喺挑選款式上就記得要避免揀雪紡長裙，如果唔係好易勾爛！
5大姊妹團Posing Ideas！
一班姊妹一齊影相，唔係擺出「Yeah」手勢就係俾心心，不如事先Bookmark定一系列姊妹團影相Ideas，到Big Day當日自然唔駛你眼望我眼！
1/ 利用道具捕捉自然喜悅！
利用一系列道具，做出一連串拋彩紙、開香檳、玩氣球等動作，捕捉各位閨蜜嘅自然喜悅！
2/ 互相攬腰
從背面影過去，一班姊妹互相攬腰，依偎在一起，感覺甜蜜，又可以從相片中展現一種唯美感。
3/ 手挽手靠在一起
亦可從正面拍過去，一班姊妹一齊手挽手，向中間（亦即B2B方向）靠在一起，成張相嘅構圖相當平衡，亦可從相片中感受大家對B2B嘅愛！
4/ 頭貼頭Top Shot
一班姊妹一齊頭貼頭瞓喺地下，由攝影師以Top Shot手法拍攝，感覺清新又自然！
5/ 睡房狂歡派對
B2B可以喺床上盡情跳躍，姊妹喺側邊擺出驚喜Pose，令成張相嘅感覺都變得好有動感、好開心！
✨籌備婚禮由此囍✨全港最大的婚禮評語網站 Bespoke Wedding 婚享會，集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略： www.bespoke-wedding.com/
div class="bw_blog_ads">