準新人要小心考慮佢地既服務。我地最初係婚展同佢地公司designer Eric傾，佢係幾有心做，我地傾得好投契，但自從上完佢公司開會之後，當我地既contact person變咗係個sales Angela，就岀現咗唔少問題。

以下總結3個時期所發生嘅問題:

1. 討論前期: 要重新同佢傾過package包含既內容 - 明明designer之前話價錢包咗果d野，去到Angela到又突然話要另外加錢，要再同佢解釋返當時同designer傾過乜。

2. 討論中期: Sales跟進態度有待改善 - Angela除咗追你比錢之外，其他野好多時都唔應機，要係咁追問佢先會hea覆下你 - 我地亦問過Angela需唔需要落場地果邊睇下個環境，佢又冷漠地回覆話”唔會，我哋之前已經去過” - 最後唯有send個場地平面圖叫佢地跟住個位置去set，點知到最後就真係岀事。

3. Big day當天: Backdrop位置嚴重偏側，負責同事態度非常惡劣並拒絕修正 - 工作人員當天去到個場，冇問場地經理同新人個backdrop應該set邊個位，亦冇依照平面圖上嘅位置去set，最後set咗係個場嘅好側位置，而原本果個位置我地係預留咗要放projector同主家席 - 當時場地經理同班兄弟都有好好語氣咁問工作人員 “有冇機會可以移返過少少？” 但負責嘅女同事態度超級惡劣咁威脅話 ”唔得喎！冇可能喎！要郁你地就要起碼等多一個鐘！” - 大家為咗唔想比佢影響個進度同大囍之日嘅心情，決定冇繼續係呢個位糾纏落去，唯有叫場地經理重新調動幾張枱嘅位置，但實在諗唔明點解佢地自己處理得咁差都仲可以態度咁惡劣，表現得完全唔專業。

總結： Designer設計個backdrop確實唔錯，做到我地想要嘅效果，但個contact person嘅待人處事既態度真係好差，如果準新人唔想貼錢買難受，就要小心考慮用佢地既服務！

我好耐之前已經搵咗間deco公司落咗訂，但係之後去行多次婚展，想quote下價，見到Rosy Decor嘅佈置好靚😍，所以就問下佢哋喇。之後佢哋講左好多我個場嘅實際情況，有好多佢哋做過個場嘅實際經驗話俾我哋聽，發現原來我落咗訂嗰間好多佢應承可以做到嘅嘢係做唔到嘅。佢哋嘅同事Angela會好老實咁話俾我聽個場有啲咩係做到有啲咩係做唔到，俾到啲suggestion同信心我，我都驚其他公司會喺婚期一個月前先同我講做唔到，我唔想咁樣焗住接受其他樣，所以最後就決定搵Rosy Decor整成個場嘅decoration，包括backdrop同reception檯喇😆。

喺成個同佢哋溝通嘅過程中，雖然用咗好多時間，但係我覺得係正常嘅，因為佢哋會好detail咁講到我個package包啲咩，全部嘢都白紙黑字列明。我喺婚展同佢落訂講嘅內容同我婚期兩個月前同佢落實要點做嘅內容係一模一樣，唔會話呢度加錢嗰度加錢咁👍🏻。我一開始係喺佢哋做過嘅設計嗰度揀，佢哋會俾意見我，睇我鍾意咩色tone再去執整，成個confirm嘅流程好快，每個part嘅設計要點做都好快決定到。因為我有兩隻狗，同佢哋講話好想啲狗仔相可以出現喺我個婚禮度，佢哋就建議我可以做啲foam board，俾人揸住影相喇，又會俾佢做過嘅reference我睇，真係好好啊🥰。

婚期前兩個月我上咗去佢office傾個rundown，傾得七七八八嘅時候我屋企突然有啲急事發生，佢哋就話叫我搞掂咗屋企嘢先，佈置啲嘢交俾佢哋就幫我搞掂。嗰陣時我應該係要俾訂金，但係佢哋都話到時再算喇，唔好再搞住喇，處理咗屋企嘅事先。之後我同佢哋喺whatsapp聯絡，佢哋俾啲draft我，我話要改啲咩，佢哋就已經好明確知道，所以好快就confirm到final嘅version喇。

Big day當日去到個場我掛住去換衫化妝，佢哋好快手已經搞掂哂，出到去睇成個場已經無咩要執要改，好有效率好專業。見到嘅實物真係同我預計一模一樣，我哋好滿意啊，賓客覺得啲佈置grand得嚟又簡潔，好配合到個場，賓客直情鍾意到想拆走我啲嘢添🤣。

我未去婚展前都上網睇過好多deco公司，我揀嘅Rosy Decor最standard嘅plan，reception有啲珍珠同啲既定嘢咁，老實講係同出面有啲千篇一律嘅，但係我就見到其他deco公司會有啲創新，所以佢哋可以考慮upgrade下喇🤓。我都明白呢個package嘅價錢嚟講係俾幾多錢就攞幾多嘢，但係如果佢哋有啲再勁啲嘅嘢，我會願意再俾多少少錢。同埋我進場嗰個位左右會擺啲一set set白色嘅假蠟燭，佢哋嗰陣時同我講話額外租一set三支咁樣要500蚊，雖然做生意係明碼實價，但係set 呢個價錢真係多咗啲。都知道好難用淘寶嚟比，始終要運過去set埋都係服務都係時間，明既，不過如何可以將個落差set得窄啲咁就會容易啲接受喇。😅不過我已經介紹咗Rosy Decor俾其他朋友喇，希望佢哋可以加多啲新嘅嘢，就可以upgrade到佢哋嘅服務喇。