我地喺婚展搵佈置公司，但差唔多全場睇過晒都唔係好啱，而且間間好似好standard咁！好多間直程係問你喺邊個場搞，然後就攞晒佢喺個場做過嘅相出嚟，我地個場係成場都冇人做過，有啲公司就吹水話做過，但最終又攞唔到相出嚟。我地個場個backdrop位係有個位俾你放擺設，我地就想利用埋嗰啲位同埋啲柱做backdrop，所以我地就想搵一間會親自去睇場去度尺，同埋會recommend有咩decoration適合呢個場。我地去咗好多間佈置公司，逐間形容俾佢地聽個場係點，大概有呢啲咁嘅限制，問佢地會點樣幫我諗個design出嚟，然後再問佢肯唔肯幫我地去個場度尺，有啲係唔肯話唔得閒，又話：「個個場都係咁架喇我地都係咁樣做，你講俾我聽你要幾大個backdrop就得架喇！」但我地根本都唔識點話俾佢聽！之後問過好多間，得唯一呢間話設計同佈置前一定會去個場度尺，所以就揀咗呢間。 同佢地傾嘅時候，我地形容俾佢聽大概有咩擺設喺個backdrop度，再問佢有咩idea可以design，記得嗰位同事叫Angela，佢係好有心機幫我地諗好多野去match個design，我地都係好鐘意，同埋佢真係有心幫我地諗。其他公司只係叫我地就咁揀啦，有A款B款C款咁。我地都有同佢地講我地有budget concern，都唔想搞到好貴，Angela都有就住，話呢個價錢我地可以試吓咁樣咁樣做。我地都問過一間係只要有少少tailor-made已經double左呢個價錢。我地揀嘅standard package本身都有啲野唔要，佢都話︰「你既然減左呢啲咁我加番呢啲俾你都冇所謂啦，最緊要係整得靚！」 當時喺婚展傾完都已經覺得佢係全場最好架喇，之後再上去佢公司同佢傾design我地都問佢可唔可以都係佢跟我地，因為佢話如果有幾張單未必一定係佢跟。同埋我地個場又比較多restrictions，我地改左好多次design佢都係咁幫我地改。 最後，我地big day當日係Angela親自跟，個佈置效果真係好靚! 我地本身係遲左完，Angela佢一個人係坐左喺reception等埋我地先走。另外，我地仲有啲鮮花decoration係自己做，但係個場又唔肯預先俾我擺定過去，我就要當日搵人運過去。點知送花個人遲到，七點都未到，佢就一直喱埋左等嗰個人嚟，因為佢驚嚟到嗰陣冇人負責去擺番啱嗰個位。我當時就以為佢企左喺度係咪冇人俾利是佢，佢就話：「唔係呀，我等緊個花呀，你唔駛理我架喇！」佢係真係想make sure啲野擺啱晒。