由我先生求婚起到我哋擺酒都只係半年嘅時間左右，因為唔想拖咁耐，所以擇咗日子就好快揀咗幾間覺得啱嘅場地去問吓佢哋有無期。地點方面我哋好早就鎖定咗尖沙咀，因為雖然唔少親戚住新界九龍，但亦有好多朋友住港島，所以覺得尖沙咀不論搭車或者揸車都好方便。嗰時我哋都想快啲處理又鎖定好地點，就無特別去行婚展，都係自己打電話去約睇場。主要睇咗Sheraton、InterContinental 同Mira，睇完呢三間之後都唔想再去睇其他。最後係Mira有期，同埋去睇過場個感覺都適合。我覺得Mira最吸引嘅地方就係Ballroom樓底高，入到去感覺舒服，唔會有壓逼感。雖然夜晚佢哋會落晒窗簾，但係始終我都知佢有窗，感覺唔會咁焗促。 去到Mira，係由Carmen帶我睇Ballroom，佢好清楚同我地介紹晚宴個PLAN，我無去婚展佢都有俾婚宴個special plan我，有包車仲有酒。睇完其他場地後我再返去落單，就一直係由Carmen跟我哋。我覺得佢答覆都好快，而且做事好有效率。嗰時我哋本身只係book咗18樓嘅Ballroom 1-3，點知後尾我啲屋企人請人有啲out of control，就再聯絡Carmen問佢可唔可以book埋Ballroom 4 (Mira全層有4個Ballroom）。真係好彩嗰時Ballroom4仲未有人用，可以book埋，結果擺咗38圍。過程中間我仲不停問佢要幾錢，又要轉Decoration，佢都好快答我，溝通上都好舒服！佢又提議我可以用幾間Mira用開，幫佢哋個場做開Decoration嘅公司。我覺得呢啲公司都會熟個場，所以都搵咗其中一間，turn out效果都好好！佢除咗有效率，做事都好細心，嗰時我哋加咗地方都未特別諗食物，反而佢好細心咁問我哋如果食物唔夠都可以幫我upgrade，真係好幫得手。咁啱佢自己都就快結婚（佢10月結婚，我1月結婚），大家可以一齊傾吓預備婚禮嘅嘢。有時我訂咗啲嘢，佢又同我傾吓，之後主動聯絡其他啲公司幫我compare吓啲價錢，我覺得呢啲佢係額外做俾我！ 由於我哋book晒4個Ballroom包晒全層，所以新娘房都有3間，當日都有好多位置放嘢，好多空間。婚禮前個場無人，佢哋都容許我哋早啲做set up，都好smooth。到證婚嘅時候，我哋原本無預好多人黎，但點知最後係滿晒人！因為我哋預少咗，結果準備咗嘅餐前小食都係完全食晒，不過啲人都話好食！ 晚宴嘅時候因為我哋有好多圍，唔想啲人太肚餓，所以預定8:20就開席。我覺得佢地上菜效率好快，就算係38圍人，到11:00 啲人已經食完走晒！我覺得主理婚宴當日嗰個manager Ken佢Manage得好好，跟得好足，38圍佢地都處理得好快手，人手好充足。晚宴食物我無食好多，但問返啲人都覺得OK，夠熱。 晚宴嗰度其實有個小插曲，就係關於table decoration。Mira其實有好多scene deco，我見到 佢哋啱啱出咗一套粉紅色head table枱布閃令令好靚，不過男家嗰邊就特別傳統，一定要用紅色枱布，所以開頭我哋都order做咗紅色。不過當日竟然出咗個minor mistake，幫我哋舖咗粉紅色嗰種枱布。但係我見男家嗰邊又好似無咩，所以我都無提佢哋要換返，因為我自己本身都想要嗰套多啲！ 除咗Carmen同Ken，Big Day嗰日佢哋啲staff真係好照顧我。有個跟住我幫我拎住裙尾嘅員工，我行得勁快佢就跟得勁快，一見我影相仲即刻彈落地下！斟茶嘅時候都唔使提佢哋，已經係隔離好Ready準備好晒啲嘢。去到婚宴最尾，有個男仔staff見到啲客人走晒，就即刻攞酒店拖鞋俾我換，令我覺得舒服好多。佢哋又有預備啲食物都送晒上房等我同先生上到去可以食，包括結婚蛋糕、香檳、小吃同埋成個婚宴嘅Full course。當時仲有2個同事送我返房，幫我攞住條裙尾，真係好好嘅照顧！ 如果之後有朋友擺酒，我都會推介MIRA俾佢哋。我自問平時都挑剔，但今次同Mira真係合作得好舒服，佢哋態度都好好，真心值得推介！

一開始我要諗去邊度擺酒時都喺去婚展行下，嗰時見到Mira個booth個package幾好，就同太太（當時係未婚妻啦）過去睇睇。我哋覺得佢哋啲staff都解釋得非常詳盡，就諗住不如揀Mira，所以之後就再去酒店同佢哋傾details同落訂。 我哋覺得嗰度地方夠大，裝修又同其他酒店唔同，除咗我哋一對新人之後，啲賓客影相應該都配合到。到婚宴嗰日果然見到好多朋友喺場地度自拍都玩得好開心。雖然ballroom裡面比較暗（台係夠光），但都有好多地方可以俾啲guest自己去拍照留念，而且我覺得啲相影出黎都幾靚。 除此之外，我覺得佢哋俾我嘅感覺好專業，特別係跟我哋嘅staff Eva???（希望無記錯名）俾咗好多意見，教晒我哋可以點樣籌備婚禮。除咗Rundown上嘅好多細節都提點我哋點安排會好啲，仲有好多supportive嘢俾到我哋。好多時好快就睇吓有咩可以幫我哋預備先，好多嘢都幫我哋諗晒咁濟。出門嗰朝早玩新郎間房要啲咩，佢都幫我哋預備得非常之好，因為佢一早就同我哋講有需要嘅道具都可以問下佢哋有無先，等我哋唔使買。就連婚宴嘅第二朝，外父外母啲早餐點安排佢都問定我哋。總之好多嘢我哋都未諗到要做，佢已經提咗我哋要去諗吓，決定好之後佢就幫我哋安排好晒！ 至於當晚我最有印象嘅，就係佢哋幫我預備咗現場直播六合彩攪珠!!! ??事源係我同太太都諗住唔好搞咁多表演，都諗住中間啲時間就咁算。後來我發現結婚嗰晚剛好係有六合彩，就諗住送張六合彩俾賓客做回禮。當晚派票俾佢哋，等佢哋劃完就即刻幫佢哋買。Eva佢聽完我呢個idea之後，覺得影住MC就咁讀啲數出黎會悶悶地同無咩意思，就提議我哋試下用個screen播電視，做現場LIVE feed！估唔到佢哋真係幫我安排到，嗰晚啲賓客一齊睇六合彩攪珠等叫數字，現場氣氣都好好。最後當晚有人中咗，唔只一個，有幾個人中，雖然都係中左$40左右啫，但嗰個環節大家都好開心，我好appreciate佢哋幫我哋度咗呢條橋！ 其實結婚當日我同太太都唔得閒理，係靠我啲兄弟同Mira嗰邊合作。但係當日都好smooth，至少我都唔覺有咩特發事發生，對新人黎講真係好大幫助！我覺得大家成個wedding都好緊密連繫，真係真心多謝佢哋！