我地開頭搵場地都真係搵左好多間，初頭去過睇文化中心，個場係L形，台又好細，真係唔掂，所以就無揀到。之後就去咗睇紅墈彩福、譽宴個啲，但係佢地啱啱裝修完，全部都好公主feel，完全都唔係我地style，所以又唔岩…… 因為我地都想個地點方便啲，就再去尖沙咀搵，但係有D場地就太大，好混亂咁，有D就好貴，完全超過我地budget，再唔係就係新裝修個啲style太暗，好黑，完全唔啱啲老人家！去到最後我地先終於搵到The One利寶閣，佢地個位置好就腳，一上去就係地鐵，而且係四方形嘅場，好好用，又無柱位。 初頭我地都唔知佢地啲野食點樣，所以我就叫左我啲親戚普通時間去食吓飯，因為我地覺得試菜實整到好好味，要平時去先知真係唔好食。我啲親戚佢地去試完都話幾好，再加埋家姐去過嗰度飲都話唔錯，咁我地先再帶老爺佢地去試菜。啲野食都真係好好味，同聽返尼啲feedback好一致。 佢地嗰度擺27圍就爆場，我地擺23圍，所以都舒服唔會覺得迫。當日啲員工服務態度都好好，不過樓面就好似唔多夠人，D人成日要走多幾轉咁。同我地傾嗰位黎小姐都好好，好好傾，好似朋友咁，都好幫得手。新娘房都夠大，個洗手間都好大。唯一唔好就真係個音響，嗰套嘢真係古董黎！係好舊好舊嘅機…… 我地嗰晚有現場結他手，都已經搵定個做開音響嘅人黎幫手，當個個都用緊usb，佢部機都仲係用緊DVD！我地覺得如果佢地真係想吸納下做婚宴生意，就真係要將成個system換過喇！除此之外其他嘢都好好，無咩問題～特別係位置真係好方便！