我哋搵婚禮場地嗰時，有個做攝影師嘅朋友就介紹我哋九龍塘伊甸園有個玻璃教堂幾靚，於是我哋就去咗睇場。我哋去到覺得間玻璃教堂幾靚，又有室外地方影相，就揀咗喺玻璃教堂證婚。之後幫我哋嘅consultant Eric服務都不過不失，有問有答。不過有次去傾嘢我哋早咗到，見到Eric喺門口食緊煙，後來傾完佢送我哋走之後又喺門口食煙。其實佢同我哋傾嗰時同喺場地入面都無食嘅，不過如果唔俾客人見到煙癮咁大嘅呢一面感覺就會專業好多。 我哋結婚嗰日其實都幾驚險，有場突如其來嘅大雨，啲賓客到嗰時無雨，係黎黎吓先忽然落起大雨！雖然之前都有睇天氣報告話有可能落雨，但係都無諗過咁突然。不過場地嘅職員好似早有預備，即刻自動自覺幫我哋開啲好似一個一個涼亭嘅篷黎遮雨。於是有啲賓客就喺玻璃教堂入面避雨，有啲就企喺篷下面。但係由於個新娘房係臨時喺室外搭出黎，落大雨啲水就衝晒入新娘房，連我對鞋都浸濕晒！好在啲大雨只係一陣，都算好快就停咗，唔係都唔知點算好喇。 講返證婚嗰度，MC小姐喺佢哋場地嘅職員黎，都好專業同熟手。場地器材方面，都只係俾音樂碟佢哋幫我哋播，音嚮燈光各方面都好穩定同正常。律師先生都喺場地嗰邊幫我哋安排，佢衣著整齊唔會搶鏡，又笑容滿面，俾我哋嘅感覺好好！我哋嗰日其實只係book咗2個鐘左右，但因為佢之後無booking，所以都俾我哋喺佢個場地度繼續影相，無趕我哋，所以感覺都幾好！