我哋揀Marco Polo都係因為佢喺尖沙咀，位置方便，加上我哋預三十圍，人數比較尷尬因為話多又唔係多，細又唔係細，所以場地都唔多選擇。 當初嗰位sales叫Denise，佢本身係做開corporate event，派咗佢跟我哋就一路都係佢跟，而咁啱當時佢都準備結婚所以都俾咗好多ideas我哋，佢所有嘢都跟得好好。我哋都冇擺酒嘅經驗，咁佢哋都俾咗好多advice我哋，例如backdrop﹑枱布﹑排位﹑出門會唔會喺酒店出同埋有關交場嘅arrangement，呢啲Denise都跟得好好，俾咗好多advice我哋。Denise亦都帶我哋睇咗好多次酒店房，最後我哋揀咗間比較大嘅suite，諗住到時咁多人會舒服啲同埋影相出嚟空間感會大啲。 當日我哋都冇咩點食嘢，但係聽番啲賓客講都話okay。另外AV equipment方面因為個場只得得兩個projector，有啲賓客可能會唔係幾睇到，所以如果可以有多一個projector會好少少。至於當時係啱啱裝修完，我自己就覺得個感覺有少少「娘」，例如佢地地毯係用冷色系，睇落感覺就會有啲沉。另外就係佢哋banquet個hall有啲難搵，所以如果指示方面可以多番少少同明顯少少就會更好喇。