(煌府婚宴專門店 - 廣東道188) 我擺咗34圍，揀港景峰煌府係因為有朋友喺嗰度擺過，啲嘢食唔錯，同埋都好少哋方可以擺到咁多圍，因為本身其實我係預35、36圍，係後尾縮到34，所以一定要搵個大場。我係喺婚展度搵到佢哋，佢哋都ok唔算chur，因為我早年半前book，所以佢哋都冇咩所謂。 嗰時係吳剛師傅喺度，佢坐喺隔離。好搞笑架，係你去問佢當日有冇期，突然吳剛師傅拎本通勝行過嚟話：「幫你哋夾埋日子啦！」睇下呢日係咪好日，佢仲幫我哋免費夾八字咁樣。唔知佢講係真定假啦，不過佢係會喺隔離幫你夾八字。其實本身我都係揀嗰日架喇，不過佢過嚟講多兩講就好似真係好好咁。 其實佢哋服務真係幾好，經理Apple都好細心。其實落訂嘅時候Apple都認得我，都叫到我個名。Big day嗰日去到我同佢講話肚餓，佢即刻話：「我去拎個麵俾你食啦！」我都冇為意，佢拎到個麵過嚟係剪碎哂俾我，因為我化好哂妝，佢仲要餵埋我食，我覺得係好surprise！Apple仲餵埋我食，真係好到不得了！另外，當日全程都有個叫做「天使姐姐」喺我隔離幫我拎裙換衫，好似姊妹咁喺我隔離幫我。 而食物方面，賓客都話好滿意。 不過如果個音響可以好啲就好喇，因為我進場嗰下突然爆咪，因為個場都有返咁上下歴史，可能佢要換一換個音響會比較好。但環境方面其實OK，因為佢哋都啱啱裝修咗。

(煌府婚宴專門店 - 廣東道188) 我哋係喺煌府188擺酒，貪佢地點方便。我哋都有比較過其他，但係就貴咗啲，同埋有啲一係細得濟一係大得濟。煌府嘅sales Apple喺價格方面好幫到手，清楚我哋需要之後都好快傾掂價錢。當時其實我係搵唔到場，好彩個emcee幫我聯絡Apple，個emcee係煌府內部嘅，但同時都係我朋友介紹。 煌府個package仲會送其他嘢，我哋就揀咗送三套衫。整體嚟講個環境可以再改善，例如個seating plan就咁用張A3紙貼喺門度，再加個架係用金色框，個design都比較老套，令到後來要自己DIY搞好多嘢先好啲。另外，backdrop臨擺酒時轉咗冇話我哋知，搞到後來要搵decoration House 嚟整靚佢。不過我哋係幾欣賞佢嘅靈活性，好似當晚佢有間房俾我哋擺嘢，仲將麻雀房改做換衫房，變咗多咗間房俾男家換衫。同埋啲姐姐都擔心我肚餓，成日提我食嘢，都照顧得好周到好細心。嗰晚我都有個小表演環節，就係踩住平衡車拎住紮花，啲staff都好好咁幫我清場，Apple都俾我喺個埸度rehearsal好多次，真係好好。 雖然個場唔係好靚，但係啲服務真係搭救到！Apple服務真係好好，我同佢講我啲同事比較大食，佢就叫廚房幫我哋加大啲食物。