我喺台灣影嘅，呢件事真係令我好嬲。我喺香港婚紗展搵到佢哋，有個台灣佬講普通話，好典型咁Sell。成個過程係我先生簽嘅，所以我都唔知點解佢會揀咗呢間。我試過佢哋嘅服務之後好嬲好唔開心！！ 我係飛去台灣總店影，佢哋嘅禮服同婚紗都好殘舊，款式好少，我真係冇一件揀得落手。佢講到自己係總店，俾好多相我哋睇，有部份相嘅質素係我想要嘅。當時唔知邊個攝影師影，淨係覺得啲相都幾靚喎，婚紗服飾有啲我都鍾意喎咁樣。我請咗一個星期假去台灣影，當時係想去台灣影櫻花。去到係我哋唔好彩，天氣太凍所以好少花，於是入咗去個主題公園影啲假櫻花，個公園專係俾人野餐或者人家大細去影相。入去影嘅費用係唔包，我哋要自己俾返。成個過程最唔開心係，我哋有我哋自己想擺嘅pose，我諗唔到嘅時候個攝影師係要主導，指點我哋點做，之後我發覺佢只係得A/B/C餐︰A.我攬住我先生望住鏡頭 B.望向上 C.望住地下，就係得呢三種！我已經諗盡哂我想擺嘅Pose，但佢就得呢啲咁嘅選擇俾我哋，當然影出嚟嘅質素我係覺得好唔滿意。 除咗呢樣之外，當時我哋係上山影，因為我哋影相時大概係2月仲係好凍，當時山上有好多風景都係唔錯嘅，但唔知點解佢哋係要揀啲背景全部都係枯枝同枯樹去影相。佢影完之後睇返啲相，我好唔滿意佢嘅取景。因為地點佢哋冇諮詢過我哋嘅，佢話佢哋建議，我哋咪聽囉，因為我哋唔識台灣啲哋方，唯有選擇信佢。佢揀啲背景全部係樹枝，已經落哂葉，都算啦影得我靚就ok。第二日我去睇相，我竟然見到佢影埋個雀巢喺我頭頂上面，我直情覺得成件事係離譜。我成個感覺就係佢哋求其搵個哋方影相，交功課就算。嗰日係堅凍，我著啲婚紗全部都係露背嘅。 而我呢啲身算小事啦，到我先生，佢係冇一張相入面係正常嘅樣。本身佢著嘅西裝已經係唔啱佢size，因為原來男仔禮服佢哋係外判出去，係冇得改，想做任何嘢都要額外加錢。其實去到當日知道佢成個情況係咁，我哋已經好唔開心。但係人都到咗，唯有希望啲攝影師好啲影得靚啲。我哋睇完相之後發現我老公嘅髮型係俾風吹到散哂，冇人會幫佢整理；仲要佢西裝上面全部都有我甩哂妝嗰啲粉同色喺度。啲店員同我講話：「放心啦！我哋會幫你執走佢！」我俾咁多錢唔係想要執相，如果我要執相我就返上大陸影啦。我哋俾咁多錢原因就係唔想執相執得咁勁，想搵一個好嘅攝影師，專業嘅。 Total佢幫我哋執咗三次，唔ok，好假。最後係我自己親手落手去執，我本身係designer，我一睇就知佢哋係咪有心去執，一眼望落去根本有問題。事後我都有同啲同事傾過，佢同我講：「吓你揀微微呀？我上網望過佢哋啲評語唔係咁好喳喎！」當時都已經影完咗，後悔都嚟唔切。之後喺台灣嗰邊所謂嘅店長，同我哋講：「不如你哋再影多次，費用全部入我哋數。」嗰次影完都冇咗半條人命，邊度仲有第二條命俾佢哋遭質。佢哋係要求我哋朝早七點到佢哋度，要化妝換衫，跟住就等。 揀相嘅時候我係一路睇一路鬧，佢哋限定只可以揀52張，多咗要俾錢買。我同佢講：「我一張都揀唔落手，你可唔可以退返錢俾我！」我係朝早去揀相，揀到夜晚六七點，因為真係完全揀唔落手。我不停碌入面嘅相，只可以揀返啲唔係咁樣衰嘅相出嚟。 我覺得佢哋要做好啲嘅關鍵係，佢要話俾我哋知佢哋啲婚紗唔係咁多選擇，因為佢哋婚紗分咗大、中、細size，可能我睇中咗大碼嘅款，但佢係改唔到亦唔肯改俾我著，因為我係著中碼，個款亦都唔會有中碼，啲款亦唔會有重覆。晚裝啲衫簡直係土到冇得再土，基本上香港嘅女仔係唔會揀嗰啲款，完全係揀唔落手。佢哋態度係好嘅，好婉轉咁話俾我聽我唔可以揀大碼衫咁樣。佢哋全程都係有禮貌，只係我唔滿意出嚟嘅結果，因為我哋俾咁多錢都係想要專業嘅相。 其實所謂台灣嗰邊嘅店長知道我哋俾咗二萬幾蚊港幣去影呢輯相，佢自己都覺得唔好意思，但係佢冇其他辦法情況下可以幫到我哋，亦唔可以退錢俾我哋。我唔建議人哋去婚紗展，我覺得可以睇下做個參考，但如果係想去外哋攝影最好去當哋搵，而唔好喺香港揀啲package，除非佢有錢到係帶香港crew去外哋影。我想話原來我哋香港嘅攝影師就算係一個好普通，唔靚嘅哋方都可以影到靚。 於是我同老公講我點都要再影多次，不過一定要揀香港影。我哋影完呢輯，佢哋俾左好大本相簿我地，我地直頭成本掉咗。因為越睇越火滾，留喺度盞令自己更加唔開心。我當係兩萬蚊買個教訓！