同佢開始時傾落聽得出佢好熟個場地，解決咗我一直以嚟嘅擔心。 因為我哋個ceremony太遠，而且又係星期六，接咗我哋可能佢前後會冇咗啲job，所以好多人未必會接。我見佢時間夾到，又熟個流程同埋地方，其實已經好好。我有好多friend都同我講佢好出名，仲俾咗佢既website我睇。我覺得律師最重要係要熟悉情況同醒目，一定唔可以亂講嘢同埋唔好咁長氣就okay架啦。 Confirm佢之前我都有同佢講話到時要同我哋既司儀夾吓，但後尾commit咗服務先知原來佢希望lead哂成件事。佢會講話自己做咗幾多wedding同埋點樣帶領成個證婚，跟住post上網。後期佢有同我講，客人揀佢時佢都會揀客人，所以希望可以做埋司儀。我老公見佢嗰陣覺得佢好鐘意出位同sell自己，覺得佢太生意人。而我就覺得真係唔需要司儀同埋證婚都俾佢做，淨係俾啲重點例如誓詞、交換戒指等等佢handle，其實應該都冇問題，因為主要都係同司儀夾吓應該就okay。 當日佢同司儀夾都有少少火氣，感覺上佢氣焰都不少。但我覺得其實無論做律師或者做司儀都好，氣焰唔大啲都未必lead到成個場，所以我都唔係好介意，而且我司儀好就得佢，因為司儀本身係牧師，份人好nice，所以就遷就佢。火藥位係我老公係ceremony前提多次佢要係某個時間就要交返時間俾司儀，佢就開始唔高興。我唔太記得當時佢嘅說話，但我睇得出三個男人企係一邊係有啲火藥味既。證婚律師可能覺得有少少唔俾面佢，同時佢都盡量爭取話想帶埋另一part，但我地嘅司儀就話自己其實係可以handle。 當時記得有一啲嘢要夾，不過佢就話因為未食嘢所以要去食嘢先。但當時只係淨返半個鐘就要開始證婚，其實都冇乜時間。於是我個牧師司儀就話跟埋佢去食嘢，一路食一路傾。重點係要做好件事，所以我哋個司儀都盡量遷就佢。當時諗，洗濕咗個頭就廢事得罪個證婚律師，所以廢事嘈。其實希望佢知道作為一個證婚律師，係一場婚禮嚟講固然重要，但並唔代表全部。佢要知道有啲位，我哋新人既期望係可能想大家一齊夾，而唔係某一方一個人去做哂，但林律師呢點就處理得唔係咁好喇。 其實佢初頭嘅出現其實係令我安心嘅，佢又準時，證婚嗰刻都好多謝佢。我老公就覺得佢好煩，因為佢成日數1，2，3叫我哋望鏡頭影相，但係又正正因為咁，所以capture到好多moment。我老公後尾有講，婚禮裡面俾咗咁多錢，最唔鍾意就係呢個服務。但我覺得，如果唔係呢個wedding，呢個律師未必認識到牧師，因為後期因為我呢位牧師朋友太有耐性，所以林律師都有講話呢位牧師司儀真係做得好好。當我同返佢講個司儀係牧師嘅時候，佢即刻好唔好意思，同我講話佢太太都有成日返教會。牧師朋友都話，有機會可以邀請佢返教會。