In Wedding係一條龍服務，成個過程冇任何「水」嘅成份，價錢我覺得有少少貴，但係我覺得係值得嘅。我哋買咗個package，一套婚紗一套褂，兩套晚裝加一套男禮服，跟住就加多一個化妝同埋攝影。 我哋揀咗攝影師Rex，時間上佢ok，準時亦都hold住個場面。佢哋當日有三個人，一個我唔知叫咩名，一個女仔叫Grace，另外一個係負責拍攝嘅Rex，佢哋都控制到場面唔好咁混亂，好快手令到成件事好流暢。因為我老公份人係時間要掌握得好，plan咗係幾點就幾點，佢亦都唔想delay。攝影師都好幫手好合作，亦都識睇我老公眉頭眼額去做嘢。我老公一個眼神，佢哋知道我老公想要啲乜，就好快手搞掂啲嘢。 我覺得佢哋俾到我哋最大驚喜係朝拍晚播，而家再翻睇都覺得好搞笑之餘好sweet。我住公屋嘅，你知個環境都唔會好得去邊，佢哋用咗好多手法令成件事個畫面好靚，呢樣嘢令我都幾surprise。我覺得佢哋好有經驗。當日我同老公同攝影師團隊都好開心，有傾有講，唔會陌生，感覺上好似大家好friend咁，成件事好流暢，大家成晚都玩得好開心。 要講一講，一開始佢哋嘅服務態度其實係吸引到我同我老公，因為我老公唔鍾意俾人冷落。呢間店係我喺網上搵到，老公見我鍾意就帶我去。一入到去個氛圍都令人好舒服，佢哋好Nice咁叫我哋入去睇，問我哋鍾意咩款。一開始係幾開心，後尾到我哋去簽單嘅時候有位小姐，其實佢唔係唔禮貌，只不過可能佢唔笑所以就好似黑面咁，你知有啲人唔笑就好似黑面咁。可能佢語氣態度上有啲唔係咁好，令到我老公唔係咁鍾意，後尾就換咗第二個人嚟同我哋簽約成件事就正常返。 成個package包咗攝影租衫同姊妹化裝，大概$28,500。

一開始我認識In Wedding，都係靠上網搵婚紗。我見佢網上話有得免費試，就打去約咗試衫。佢間實體店係一間喺金巴利道條婚紗街嘅地舖，金巴利廣場對面。 第一次去到試完嗰時佢就問我落唔落訂，但嗰時我係同我朋友去，我先生又未睇過，所以就唔想訂住。另一個原因，就係婚紗店有好多黑店，都係想上網睇下啲評價先。佢就話如果嗰日訂嘅話會送多一套俾我，我就答佢「其實啲衫我都覺得好OK，但我唔可以即刻訂，都要俾我先生睇下先，唔係好唔尊重佢。」佢聽完之後都無話啲咩，只係話之後嚟就唔可以送多一套。（佢都真係唔係嚇我，後來再返去嗰時佢真係唔送多套俾我，哈哈！） 之後我上網睇過呢間舖頭無唔好嘅comment，就再同我老公返去試多次。今次試完之後落咗訂，佢就俾我影下相，睇吓啲款（上次未落訂唔俾影相）。除咗呢次試衫，佢仲有另一次揀款同一次轉款嘅機會。所以落完訂之後，我就搵咗日上去再試，又可以試啲新嘅款。最後BIG DAY除咗件婚紗我係由頭到尾件無轉過，晚裝都換過其他款。Serve我嘅女仔叫阿蚊，佢同我一樣都係細細粒嘅女仔。我覺得佢揀俾我試嗰啲款都幾啱我，我會話俾佢聽我唔鐘意咩色，佢就會skip咗嗰啲款唔俾我睇，唔會求奇攞啲嘢出嚟俾我睇。我覺得佢嗰度啲款都靚，幾啱，唯一係啲褂比較舊，有種著咗好多次嘅感覺，啲手袖入面又會有啲黑黑地。不過其實都係我媽咪先睇得出，我自己一開始就唔係好覺。雖然近睇可能有少少走線，但係影出嚟就OK，睇唔到嘅。 到攞衫嗰日係另一個幫我改衫嘅Auntie嚟幫我，佢會教我點著啲衫，邊啲衫要小心啲，唔想我到時返嚟要賠錢。因為我敬酒嗰套衫係比較多紗，而啱啱嗰日就有套類似嘅衫還返嚟要罰$800，因為佢勾甩晒啲線。嗰個Auntie就俾我睇吓個情況係點，叫我自己著嗰時要小心啲。 到還衫嗰時，其實我big day嗰日有件晚裝個拉鏈拉到個扣甩咗，所以去還衫嗰時都驚會罰錢或者要賠錢。但佢哋睇完就話「哦！呢個扣啫，無問題啦！」唔使我俾返錢。我覺得佢哋都好公道，之前都唔係嚇你話要罰錢，而係好真心咁為你著想，提醒吓你要小心啲著某啲衫。整體嚟講我覺得都好抵，我夾埋租咗一件婚紗、三套晚裝、一件褂、兩件男裝，同埋媽媽家姐各一套衫，都係$8000。雖然少咗一開始話即刻訂就送多套嘅優惠，但其實已經夠晒著喇！