我一直都搜尋一間清啲但係價錢相宜啲嘅舖頭，但我發覺通常價錢相宜嘅裙款都比較清，而因為我始終喺大舞台擺酒，比較華麗，所以想搵D有D嘢睇吓嘅款式。我搵咗好多間舖頭，終於搵到Snowy，其實佢嘅價錢係十分之相宜，而佢入啲衫我自己幾啱feel，所以決定係呢間。而且呢間婚紗店嘅特別之處係佢成間舖頭嘅衫都可以租4日3夜。因為佢哋話都明白新人係辛苦嘅，所以比正常婚紗舖會多一日，俾多啲時間我哋走盞。因為咁我就可以早一日拎咗衫先，時間又鬆動咗，令我好開心。 佢哋係小店嚟嘅，成間舖頭有三個女仔，其中一個係老闆。衫就一定冇大公司咁多，但係我覺得都足夠，種類亦都算好多，褂又有，男士服飾又有，婚紗晚裝都有。唯獨可惜係冇奶奶衫，如果唔係我都會一次過租埋。間小店好清晰係專做新郎同新娘子禮服，走一啲比較簡約斯文嘅風格。 佢哋服務都令人舒服，入到去佢哋好friendly，最初都冇特別sell，俾我哋自己決定。佢哋免費試衫都好好，其他公司可以只可以試一件或者三件，但佢哋就俾一個鐘任試。所以我覺得小店比大公司好，比較人性化，比起大公司係唔係都講嗰啲對白，呢間小店真係會拎住個iPad同你慢慢傾同慢慢揀，好似friend咁樣。因為佢哋知道自己舖頭細，所以我嗰個鐘就淨係serve我，冇其他人。如果有其他客早咗上嚟，就會叫個客可唔可以遲少少上嚟。 我覺得佢啲衫都算新淨，但都有啲款係舊少少。但我都明白，因為價錢真係好相宜，所以我覺得已經係物超所值。