我係上網睇到affection有個花球我好中意，但係去到先知係絲花球，因為結婚通常都係用鮮花球，但我見到佢其他鮮花款都好靚，所以最後都揀咗呢間。 我個花球係傳統波波型，偏粉既。佢地服務態度都幾好，花球選擇都多，不過佢地會一開頭講咗個價錢事後又會話揀呢個要加錢，透明度唔係好高。而且佢一定要big day前一日黃昏拎，我地夏天當然想last minute拎，但佢就做唔到，問過佢個朝先拎得唔得佢都話唔得。去到Big day男士襟花好快死咗，朝早已經玩完，好彩我一早買咗絲花做後備，但我花球就無乜野，都擺到3、4日。

花球我係買絲花嘅，偶然間喺Facebook見到，好鍾意呢間舖頭。其實佢哋都有做鮮花，不過開頭佢哋係做絲花多。喺我去廣州影pre-wedding之前睇中咗佢哋一個花球，就買咗先，我好鍾意佢哋嘅作品，真係配搭得好靚。我都唔想買鮮花嘅，因為要搵人take care佢，我覺得好煩。後尾我搵佢哋訂多一個係for big day，我真係好鍾意佢哋嘅花球。 我係facebook message佢哋就搞掂。我第一次買嘅時候就俾一半錢先，我記得個花球好平$360蚊，佢哋嗰時未係好出名，俾一半都係百零蚊，到見面嘅時候就俾埋另外一半同埋拎花球。佢知我好鍾意佢啲花，就應承我結婚嗰時再搵佢，佢就俾返個舊價錢我。雖然最後佢都冇俾返舊價我，都係貴咗少少，但係比佢現價係平，因為佢記得佢應承咗我，出到嚟個花球我都真係好鍾意。 我覺得佢哋好好。我知道佢哋要多啲時間搵唔到嘅花，我預早咗差唔多半年去搵佢，俾佢有足夠時間去做，因為我知佢都好忙。我冇打過電話搵佢，都係facebook溝通。佢都有問我花球想要咩色，咩花同埋有冇咩花特別想加落去，我send咗個類近我想要嘅花球俾佢，然後都俾佢揸主意。第一個花球就係喺哋鐵站交收嘅，第二個花球佢就話俾我知佢好忙，如果出嚟交收就要啲時間。我就話唔緊要我可以上去佢workshop度拎，喺旺角嗰頭，都方便嘅。