因為我哋擺四十幾圍，而我哋兩個都鍾意酒樓，所以就去酒樓擺。我老公都幾concern間酒樓會唔會突然結業，因為真係聽過唔少，要臨時轉地方真係好難處理。所以我老公就特登search過東園係佢哋自置物業，就唔洗擔心呢個問題；當然佢個場地同食物質素我哋都有睇過ok，最終揀咗佢哋。所以我哋都冇搵過其他，一嚟睇過佢哋ok就決定。 講真由上去簽約到完咗成個婚宴呢年幾，我哋都好滿意。我哋上去問，負責嘅鄭經理（男士）都好詳細同我哋講哂所有唔同細節，唔會話我哋問到先講，而且有張List清清楚楚講哂包啲咩，令我哋好放心。因為我老公係好緊張好高要求嘅人，佢一有時間就會上去問經理嘢或者打電話，佢哋都好好服務。 不過音響方面，因為我老公當晚想唱一兩句歌，開頭都有試過咪，不過到現場嗰時咁啱佢個位收唔到，就要行前一兩步先收到，如果可以改善吓就比較好。