（彩福欣宴 - 佐敦店) 彩福欣宴有朋友擺過，阿媽又鍾意，所以決定喺度擺酒，咁當然都係佢哋滿足到我要求我先揀佢哋。一來佢哋地點OK，喺九龍區，又近地鐵站，都方便。而且佢哋食物真係唔錯，我自己去過飲都覺得OK，因為之前去過飲好多次D賓客係咁彈啲食物，所以我自己擺酒要揀間好食嘅！ 我係喺婚展Join，佢哋D收費都算簡單清晰。我睇啱咗菜單，再叫屋企人望過個場，之後先confirm。屋企人睇完都好鍾意，媽咪鍾意樓底高又冇柱。 結婚當日都好多茶要斟，佢哋嘅職員都好好，配合得好快，將啲嘢搬上搬落。食物方面真係好，親戚都讚，亦都讚個場，有晒face～ 另外，佢哋服務都好貼心，因為當晚我都冇時間食嘢，佢哋都有pack到嘢食俾我哋食。一直同我哋聯絡嘅經理叫Sukie，負責同我哋傾細節。但係我結婚當日佢咁啱要產檢，佢就交哂俾另一個同事。 不過我個package係包回門乳豬，我同佢哋約咗時間攞回門乳豬，係結婚之後兩日拎，約好咗12點拎，但係去到佢就要遲先俾到我。佢叫我要等半個鐘定幾耐，但係我係夾咗時辰，所以都有少少失望。

(彩福皇宴 - 置富都會店) 我先生有屋企人喺呢度擺過，我哋覺得個場都OK嘢食又OK，所以就搵返呢間。我喺婚展度confirm嘅，婚展拎到嘅offer係比較多。因為我擺三十幾圍，圍數比較多，所以都可以同佢哋bargain個好啲嘅offer。我哋之前都有睇啲blog，預備咗三十幾四十條問題逐條問佢哋，好似包咩唔包咩，有啲咩可以包埋等等。其實佢哋本身合個package好多嘢都包哂，但因為我擺得多，所以我就再試吓爭取多啲嘢。佢有送嘢俾我哋嘅，包括MC同candy corner，但因為我唔需要，我就問唔要呢兩樣可以換啲咩。成個過程都ok。 佢有俾一個宴會經理Macy跟我哋，都keep住好好，每一次交訂嘅時候都會提我哋有咩歌呀，rundown係點，同埋本身都有一個歌list，我哋乜嘢都唔洗搵，我亦都冇咩特別要求。On site當日，Macy就好似一個floor manager咁幫手睇住啲嘢，跟得好貼。本身唔係佢幫我confirm，係佢同事冇做之後佢take up，但佢做得好好去接待我哋。 不過，我覺得佢哋燈光可以再做好啲，因為佢哋燈光會auto轉好多唔同顏色，因為我之前都有留意到，就同佢哋講唔好轉其他顏色keep住白色，因為轉顏色，紫色藍色現場睇就好靚，但影相出嚟全部都係奇奇怪怪嘅顏色。如果想佢哋定咗顏色做白光，記得事先同佢哋溝通咗先！