(彩福欣宴 - 荃灣店) 我係喺荃灣彩福擺酒，個經理當日服務真係好好，食物質素都係一流，比預期中好。我唔係擺好多圍，我哋擺十八圍已經可以包場，個場樓底又高，又冇柱擋住個台，成個環境都好闊落。由於荃灣彩福都已經滿足到我要求，加上酒店比較貴，所以就揀咗呢度。 負責我哋婚宴嗰位經理喺big day前已經好多次contact我，同我了解番big day個rundown﹑點樣做deco﹑要提供啲咩歌，佢仲燒埋碟俾我自己揀，唔駛我煩多樣嘢。 食物方面都真係好好食，我之前去朋友酒樓擺酒度飲，覺得啲食物都一般，但呢間就幾好食，啲親朋戚友啲feedback都唔錯。另外AV equipment方面由於佢唔係用普通projector，係一格格咁，個screen就爭少少，但係啲音響就唔錯，啲聲係清晰，大細聲都ok。而環境方面整體都乾淨，但係廁所格數比較少，同埋新娘房比較細，著咗婚紗之後都幾乎郁唔到。不過整體嚟講，我哋都幾滿意!

(彩福皇宴 - 荃灣店) 揀彩福係因為近，兩邊屋企行過去都只係四分鐘，同埋男家對食物質素同份量好有要求，因為有親戚朋友試過食物覺得OK，所以揀左彩福。 本身好鐘意佢其中一個場，個天花板係弧拱形，唔係正正方方，但呢個場最多只可以放15圍。因為最尾請嘅人多左，差唔多成廿幾圍，所以就揀唔到呢層。不過雖然轉左場，但彩福都冇收我費用，仲額外送多左啲野俾我。 當日所有野都handle得好好，冇乜問題，有個叫美麗嘅staff一直都有幫我執頭執尾。新娘房好闊落，塊鏡好大，冇乜好花巧嘅野，但好實用。 酒水每席四百，加一百蚊就可以食haggen dazs。當賓客走哂得返兄弟姊妹埋數果陣，酒樓果邊又額外俾左十幾杯雪糕我地食，好開心。