當時未揀Disney前都睇過半島同四季，但係要2萬幾一圍又無乜特別。反而迪士尼就有啲特色，可以俾到太太有公主嘅感覺！而且佢哋啲食物又有公仔圖案，賓客亦可感受童話婚禮嘅經歷，唔只係食餐飯！所以睇完場諗咗一排都決定要返咗迪士尼confirm。Confirm後主要都係由 Annie 跟進，佢好細心，又會幫我哋搞掂晒成個流程。其中一度我印象真係好深刻，我同佢傾想請Mickey 同Minnie上台加強氣氛，我話係要搵人扮，所以早啲同佢講等佢預備。佢就答我︰「佢哋唔係『人扮』㗎，真喺Mickey同Minnie嚟㗎！要約吓時間睇吓佢哋嗰時得唔得先。」我覺得佢真係好厲害，感覺到佢真係唔係打工咁簡單，係成個人投入咗迪士尼嘅世界！ 到婚禮當日，就由另一位同事Yannis協助我哋。佢跟足我哋全日，到夜晚我攰佢都未嗌攰！嗰朝雖然我哋係下午先去行禮，但 Yannis 11點幾已經去咗場地幫我哋處理啲佈置，又好細心打嚟提醒我哋幾點可以過去場地，叫我哋留意返時間，唔好玩新郎玩到得太遲。而行禮前又提我哋march in時只要一步一步跟住音樂行出去就無問題。唔單止咁，Yannis仲幫我哋招呼親朋好友，連晚宴影相環節都安排得好好，啲細節佢全部打點晒，成個流程真係好smooth好perfect。 當晚嘅賓客都覺得迪士尼婚禮感覺好得意！唔講唔知，原來迪士尼Mickey同Minnie出場時，係有啲特定嘅流程要跟足。當Mickey，Minnie準備進場，司儀一定要大聲講︰「有請米奇！」同時配合音樂再開門俾佢入嚟，唔可以出去接佢哋或者「無喇喇」咁俾佢哋走入嚟。嗰時我都好煩惱到底要點做，估唔到佢哋甚至寫咗個劇本俾我點樣邀請佢哋入嚟，結果成件事超級順利！?? 由於迪士尼地點比較遠，雖然朋友方面一聽到話去迪士尼都話唔介意，話「幾遠都到」！但我哋都擔心賓客太夜走同飲得多，所以都book咗兩架旅遊巴送佢哋出旺角。其實之前有啲親戚話地點太遠，但有車接送，佢哋後來都覺得ok。 不過當晚有某幾張枱嘅朋友嘅同我哋反映，負責佢哋枱嘅待應生麻麻地。因為主家席嗰邊個侍應好好，所以都係朋友話返俾我知我哋先知。例如有個人想飲一種酒就只係斟少少俾佢，再問佢可唔可以斟多少少都係俾好少，其實我哋預備啲酒係完全夠飲，唔知點解佢好省住咁斟。另外，有個朋友唔要酒想要汽水，個職員就答佢只係得七喜。但個package應該咩汽水都有，個朋友就覺得好奇怪，於是就再問佢，但佢都係答只得七喜。不過其實都係某幾張枱啲朋友話啲服務唔係咁好，可能負責嗰幾張枱嘅侍應係炒散，唔係咁熟手，但整體嚟講，當時大部分侍應都係好好嘅！由於我覺得Annie同Yannis已經做得好好，所以都無同佢哋講返，始終搞咁大個婚禮其實好難話真係乜嘢都無問題，但係因為佢哋嘅功勞真係太太太好了，呢啲小事都其實變得無乜嘢所謂了！總括嚟講真係順利同好特別嘅結婚體驗，我哋宜家仲同Annie有keep contact，都做埋朋友了！ 另外真係要提，迪士尼因為婚宴送咗2晚酒店房俾我哋，可以揀１晚普通房同１晚豪華套房。雖然我哋喺婚宴當晚揀咗普通房，但係服務都係非常好！佢哋知道我哋都無乜點食過嘢，就將婚宴當晚有嘅食物全部留返一份俾我哋，連甜品都有！而第二朝一早，就有餐車送新婚早餐入到我哋房，真係好驚喜，因為個早餐真係超難忘！所以唔好以為係婚宴當晚先至服務好，其實其他細節位佢哋都係好impressive既！

我自己本身好鐘意迪士尼，可以講得上係超級FANS，而且我同我老公由拍拖到相識，求婚都喺迪士尼，所以都好鐘情呢個地方。不過我哋都唔係一開始就搵迪士尼酒店，之前好多其他各類型式嘅酒店都睇過，例如大學站HYATT、半島，有啲酒店open day都去過，但感覺真係比較普通。之後有次機緣巧合下去咗迪士尼酒店睇睇，sales manager Annie 好nice，笑面迎人，成個人嘅舉止同聲調都好有迪士尼character嘅氣氛！佢帶我哋參觀場地，又會了解我哋嘅故事，記低我哋有無啲特別要求。小禮物都可以做返俾我哋，感覺窩心！於是我哋就俾佢嘅service同迪士尼嘅開心氣氛吸引咗，決定喺嗰度搞婚宴。 雖然由Book咗到big day之間都成大半年，但係佢哋真係好似跟project咁serve我哋。例如我哋要幫男家Book好萊塢嗰邊一間房出門，女家就係迪士尼嗰邊，都同佢哋傾咗2-3次。佢帶我哋去睇啲酒店房，然後好萊塢嗰邊啲房係細啲，佢都幫我哋留到一間大房。 到後期我哋嘅project由另外一位同事Kelvin接手跟進。我記得有次因為我哋唔多了解午間婚宴嘅自助餐安排，就問佢會唔會啲人一次過出晒去攞嘢食會好混亂。佢就提議我哋不如俾ladies去先，之後先到gentlemen。我哋最初以為係主人家同親戚長輩去先，佢就提我哋其實就算朋友都係賓客嚟，咁樣分就大家都好開心。我覺得呢個係好好嘅提醒，等我重視返所有客人。 而音樂方面，佢哋俾咗好多迪士尼嘅音樂我哋揀做背景音樂，當然係佢哋自己迪士尼license。然後我自己march in時要播片，同佢哋講想要有聲帶嘅a whole new world 或者係beauty and the beast，佢都搵到原裝聲帶俾我。唔單止搵好俾我，仲幫我哋同場務配合試晒啲片同音樂work唔work，當日音樂播到得嚟仲要同片夾得好好！ 我覺得喺迪士尼搞婚宴個service真係嬴晒，有好多令我印象好深刻嘅片段！例如喺婚宴前我哋想同兩邊啲爸爸媽媽去試菜，感受下個環境，但係餐廳真係好難預約，Annie都不嫌其煩咁幫我哋安排好。其實本身都唔想麻煩佢，但真係好難book位，於是同Annie講咗我哋希望父母可以試菜之後，佢好快就幫我哋安排到。我哋去飲茶當日Annie仲特登OT嚟見吓四位老人家。當時係就快新年，Annie佢一見到佢哋就送咗啲利事封俾老人家新年封利事俾人，超好窩心！（然後我哋父母仲keep住到big day嗰日用嗰啲利事封封俾我哋，好正！）另外，因為我好鐘意喺迪士尼樂園入面先有嘅米奇同米妮嘅氣球，想買嚟放喺reception desk隔離，但又無理由之前嗰晚買票入迪士尼買，所以都諗唔知可以點安排。估唔到同佢哋講咗之後，佢哋就一早幫我哋買定！於是到big day之前嗰晚一入酒店房預備第二日啲嘢時，已經見到嗰對汽球喺房裡面等緊我哋，真係好開心！房裡面仲預備埋蓮子同紅棗，好齊全，攞漏咗都唔怕。 Big day當日，由於出門間房得4張房咭，而架lift又要有咭所按到我哋嗰層，所以有時啲姊妹就要走嚟走去接啲人。雖然我都明白係安全啲嘅，但就有少少唔方便。另外影相嗰時房有啲昏暗，要借燈影相，但啲職員都好快幫到安排。我真係好大頭蝦，放咗個絲花球喺酒店房。姊妹都唔知我要拋嗰個花球放咗喺邊，搵咗好耐都搵唔到，好在迪士尼員工搵方法借咗個絲花花球俾我用住先，唔係啲流程就會遲晒。仲有一樣，就係我自備咗對米奇老鼠杯敬酒嗰時用，我見第一次切蛋糕後用咗佢哋對杯之後，就同佢哋講我自己都有一對米奇老鼠杯，睇下之後啲環節佢哋會唔會幫我安排到。到換咗紅色裙出嚟敬酒時，已經見佢哋準備好我自己對杯喺枱下俾我用，完晒成個晚宴仲洗返乾淨先俾返我，真係好窩心！ 自助餐食物都係好多賓客會讚不絕口嘅地方。Menu入面有得揀有迪士尼Character嘅公仔，因為我都想有多啲迪士尼嘅公仔，所以甜品我就轉咗有佢哋嘅樣嘅款式。賓客影返相俾我睇有米奇頭Tiramisu同Duffy樣嘅食物，啲小朋友都好開心。然後晚宴嗰時，除咗主要場地仲有間細房有嘢食，工作人員見啲客人無留意到，就喺排長龍嗰時提啲賓客可以去嗰一邊攞嘢食。好多feedback都話啲嘢好食同refill得快。 不過雖然我係妙處處通金咭member，平時都久唔久會有唔少訂酒店房或入園區嘅優惠，反而big day就完全無連繫咁，有啲奇怪。我諗如果big day可以儲分或有啲upgrade，有個linkage就更好。或者anniversary會邀請你再返去，啲職員又知你係anniversary的話，都應該會好開心，成件事令成個婚禮同喺迪士尼嘅體驗更加完滿。 而婚後1-2星期後，Annie同Kelvin佢哋有寫返一封信恭喜我哋，同寫住︰「期待你哋下一次嘅旅程！」嗰時我都好期待唔知之後有BB的話，百日宴會唔會喺嗰度搞呢。然後我宜家又真係有咗BB，出年結婚一週年嘅時候已經出咗世喇，真係好期待BB的迪士尼百日宴！