迪士尼pre-wedding我哋搵咗一間叫La Sposa，係六月影嘅。當初book係搵番Annie，之後就交由La Sposa嘅assistant contact我，約我去一間喺中上環嘅婚紗店（Visa-vis）揀衫。去到之後一位La Sposa嘅同事Reginia都在場，佢哋大家都會俾意見我，建議番有咩衫適合樂園同埋酒店，Reginia又會幫我影相俾化妝師，俾個reference化妝師叫佢諗定啲造型；另外Visa-vis有位同事Amanda都好好，佢會教埋我點著婚紗，同埋嗰度有個師傅喺度可以即刻幫手改衫，可以試到啱為止。 到咗影嗰一日因為係要樂園開之前入去影，所以我哋五點鐘入到迪士尼，入到去首先去迪士尼樂園酒店個新娘化妝室化妝set頭，宋生同埋化妝師都係好準時，我哋七點鐘就可以閞始影。 當日第一次見宋生覺得佢個人好nice好friendly，到咗影嘅時候就有啲迪士尼嘅員工睇住，宋生就同我解釋番原來有啲位係唔可以入鏡（例如Winnie the Pooh，因為佢唔係迪士尼原創人物）。宋生亦都係好清楚咩位影得最靚，當日都好熱但係佢直程係會趴喺地吓同我哋影。 除咗影迪士尼樂園我哋之後都去咗兩間酒店影，都影到差唔多三點幾。即使我哋去到Hollywood酒店已經係好熱，佢都係趴喺地吓同我哋影，佢叫我哋跑佢都跟著我哋跑。另外佢又會建議加頭紗，又叫化妝師幫我掉裙尾，個化妝師可能一見到我有頭髮亂咗都會過黎即刻幫我執。仲有喺Hollywood酒店影啲車嘅時候佢提番我哋啲車係好熱，佢叫佢assistant用毛巾抹好先俾我哋坐上去。 之後到揀相就係Reginia contact我，估唔到我上到去係宋生同我一齊揀相，佢有啲覺得靚嘅就已經幫我揀咗出黎，就叫我睇吓可唔可以。我特別鍾意油畫嗰張同埋迴旋木馬嗰張，個構圖好靚。攞相係有兩本album同埋一個好大嘅油畫，佢係迪士尼訂造嘅，直程成個盒同埋個相簿面都係迪士尼特別製造，真係好靚﹗ 但係有一樣嘢好嬲就係有個blogger喺影完pre-wedding之後喺佢個blog到數落宋生，話佢影啲相一張都揀唔落，咁我就好奇怪點解佢可以去迪士尼影相但係就唔駛擺酒，可能就係迪士尼sponsor俾佢，佢又有用自己手機同埋DV機影相（但係迪士尼係唔批准嘅），所以我覺得迪士尼都幾unfair，不過啲相又真係幾靚嘅～！

我本身好鍾意Disney，而當我哋決定結婚就已經肯定要响Disney擺酒。Serve 我哋嗰個 sales 叫 Annie Chu，佢會同我哋解釋各種package同埋theme，我哋揀咗Mickey Minnie theme，而Annie會留意嚟緊其他新人有無set呢個theme而會約我哋去睇清楚當日set好咗個場會係點既感覺。Annie 喺過程裏面好有責任感，我哋問佢所有嘅嘢都好快覆我哋，例如初時未知人數會有幾多，Annie都會解釋返唔同人數响唔同場地既選擇，好清楚。 到我哋confirm咗之後佢就pass咗俾另一位同事Loretta去處理同埋做我哋既婚禮統籌，佢會幫我draft哂由去酒店到走嘅rundown。Loretta嘅服務都好好，佢會好詳盡咁同我哋解釋幾時要做啲咩，又用唔同顏色highlight住啲重要日期（例如confirm菜單﹑電視slideshow嘅相），非常貼心。Big Day當日Loretta都有在場幫我打點唔同嘢，例如當日我叫伴娘幫手check-in間房，但係因為太多人佢排咗好耐隊，我老公就打電話俾Loretta，然後佢就幫我處理好，好快就攞咗條鎖匙俾我上去；另外佢亦都有同我老公溝通好有關律師點樣嚟，又同我哋rehearsal帶著兩對花仔教我哋點樣行出去，亦都有提番司儀說話上有啲咩特別要注意。 親戚朋友好多都話佢哋嗰日啲嘢食係佢哋去飲咁多次以嚟最好食，而我都記得份龍蝦真係好好味。到最後既甜品都唔係平時普通嗰啲美點雙輝，係好特別親託返Disney主題既，例如有米奇老鼠頭嘅布甸﹑芝士蛋糕等等。 嚟得Disney都有一啲佢哋啲規矩要遵守。例如普遍場地用projector係包埋係價錢裡面既，但係Disney就唔同，佢哋播片個projector係「一定」要額外收費嘅。佢哋話因為部projector唔係普通投射落去嗰啲所以就要另外收。呢點Annie第一次見面就已經同我哋講咗，好清楚，所以我哋都有心理準備。另一點就係當晚片段裡面（如早拍晚播，成長片段）係唔可以加攝影師嘅logo，好彩我哋既攝影師都okay配合到，所以一定要預先同攝影師溝通好以免尷尬。如果要Live Band又係要留意，因為Disney係唔準其他外面既Band入嚟彈既，要的話一定要用佢哋既Band。其實呢點都其實係個優點，因為其實當晚Disney會幫我哋準備晒所有既音樂，而Disney出品既音樂質素一向都唔錯，起碼上乳豬既時候唔會播埋嗰啲老土「喜氣洋洋」歌。另外就係場地裡面放出嚟嘅相好多都要俾佢睇過，係唔可以有其他牌子既公仔，呢樣Disney都執得幾緊。 最後都想提下我哋係度影結婚相既小插曲。我哋影 pre wedding 都係經Annie 安排，事關要响Disney影pre wedding係「一定」要响Disney擺酒，而要影的話亦「一定」要用佢哋endorse咗既攝影公司。間公司好好，相都好靚，但呢個唔係個重點。重點係我影相之前都check過吓，我留意到有一個叫「水魚星球 Water Fish」既blogger，佢放咗條片係Facebook show佢响樂園影pre wedding 既過程。條片裡面見到佢又用手機影相，又用自己部DV拍片。咁到我哋影嗰日我就諗住攞部手機自拍張相啦，都未影嗰時化妝師已經提我話Disney嗰邊係唔俾人自己影相既，我當時都覺得好無奈，點解人哋Blogger就可以唔擺酒有得影，乜嘢規矩都唔駛遵守，而我作為一個俾足錢既客人就全部都要跟規矩做，呢點我就覺得都好唔fair。 事後都繼續留意個blog，見到個blogger後期都係咁鬧當日Disney輯相幾差，又話啲相一張都揀唔落手，又話佢影到連普通人既水準都無。睇嚟Disney 裡面啲marketing諗住招待個blogger等佢寫好啲，點知個blogger寫到咁差，都唔明點解搵佢。撇除當中我覺得unfair既地方，我就好滿意晚宴同埋輯相，都好靚，絕對唔係個blogger講得咁差。