其實一開始都無諗過去到數碼港咁偏僻嘅地方，都怕啲賓客唔方便。不過因為日頭我哋喺去伯大尼教堂度證婚，就想搵個近啲嘅地方可以車啲賓客過去。之後見到艾美酒店都算喺附近就打去酒店度約時間睇場地。我覺得嗰度都比較寧靜啲，環境幾舒服。 跟我哋張單嘅主要係經理Hermia Wong ，佢真係好照顧我哋，又盡量幫我哋搵discount。喺婚宴各項安排上又係好有經驗，俾咗好多好好嘅建議我哋，最尾成個婚宴都run得好順。 場地方面，因為中菜廳比較細，擺唔到好多圍，所以最後我哋就喺西餐廳Prompt嗰邊包場做buffet晚宴。Prompt嗰邊都大約只可以容納100個人左右，而啲坐位係L型，所以場地限制上有啲賓客望台都會睇得比較辛苦。但係啲賓客都覺得啲嘢好好食，選擇都好多。 不過始終艾美酒店個地點都唔近市區，所以預啲日子係鬆啲，第二日唔使返工就比較好，等啲賓客唔使咁辛苦。好似我哋係星期日擺酒，第二日啲賓客都要返工，9-10點左右佢哋就開始走。所以我諗如果有新人都係咁嘅日子擺酒就要預全部嘅流程早啲完，等啲賓客返屋企。當日酒店方面其實好好，包埋2架旅遊巴俾我哋送啲賓客走，但可能係等完晒成個婚宴先會開車，好多賓客反而自己9點幾10點就坐的士走了。