我去左LMR租衫，因為覺得佢係大牌子有信心保證，雖然都知佢比較貴d，但我始終驚坊間有一啲細公司可能會有唔知咩問題出現，而且咁啱嗰排又有好多婚紗公司執笠嘛。佢多款揀，同埋間舖都大，而且佢一個鐘頭只會serve兩組客，唔會似啲細公司咁你試緊衫可能又有人喺出面揀衫咁，變左你真係去試衫會有返自己私人空間，私隱度好高。 因為佢其實同DBR係同一間公司嚟，所以去到final fitting要去返DBR嗰邊，嗰邊人多啲同個環境冇咁好。因為嗰邊係買衫嘅，變左好多人會改衫試衫攞衫，職員忙啲變左會serve得會冇咁好。 我開頭上網睇comment見好多人話佢哋好串呀點點點，但serve我個sales Maggie好nice，佢真係會講邊件啱你邊件唔啱你，啲comment好有用。

其實我好遲先開始籌備婚禮，而且我又係嗰種會想花好多時間落去做research嘅人，結果都我好遲先去試裙同租裙。嗰時我都唔知去邊間好，見LMR賣好多廣告，就諗住上去睇下試婚紗係咩感覺先。第一次上到去試完之後我就走咗，因為始終未試過試婚紗呢個環節，就諗住睇多幾間先。而且上網睇評語見到啲人都係話麻麻，我又覺得都幾貴，就諗唔使咁快落訂。 結果我試多咗其他幾間都覺得唔係幾啱，睇啱嗰啲又無期。後來到得返2個月時間左右，我啲朋友都叫我快啲confirm，唔係會無衫。我諗返都覺得LMR嗰件係最特別最鐘意，就決定再返去LMR睇。 第二次返去嗰時，唔知係咪因為佢哋有record mark低，都認得我同埋記得我試過邊件。但我覺得佢哋嘅態度真係麻麻地，感覺有啲串，語氣唔係幾溫柔。最重要嘅係我覺得佢哋真係好海鮮價！第一次上去時佢見你想走，就話平俾我，啲價錢可以傾，但第二次再上去俾我個感覺就係開天殺價。佢嗰度啲婚紗又全部無標價，真係好難reference一開頭唔係呢個價。不過我都擔心自己會無鐘意嘅婚紗行教堂，所以最後都決定咗喺嗰度租，租咗$12000一套婚紗。事後我睇過其他名牌婚紗，好似都唔使咁貴，不過好在我都真係覺得條裙係自己鐘意，就算啦。至於還衫都順利，我係叫屋企人幫我還，自己就無再返過間店。