呢間顯卓婚紗係我參加婚展見到嘅一條龍服務公司，當時唔係好多research之下就俾咗錢。俾咗錢之後我同我老公一番到屋企都後悔啦，冇睇清楚就俾錢，不過唔緊要啦即管睇吓會點。個價錢係最後減咗D，因為本來我係join埋攝影服務，但因為擔心個攝影服務，所以臨結婚前一個禮拜都因為一啲事都冇用到佢。 我都知道佢地係老店，啲服務員都係上咗年紀，揀衫都真係麻麻地揀到。好多公司都會俾個ipad你揀衫，但係佢個ipad好舊款都冇咩update。我就問個姐姐︰「點解個ipad啲款好似好outdated咁嘅？」佢居然話︰「冇辦法架喇！冇人update呀嘛，冇人update咪冇囉！」佢地啲sales啲銷售手法真係好奇怪嘅，你著親邊件佢就會同你講佢屋企邊個邊個例如孫女著過呀，總之你拎起邊件就話呢個著過嗰個著過。我又唔會理佢邊個著過，同我嚟講冇咩關係，呢個真係好怪。同埋啲款真係麻麻地，我當初揀咗成十幾件衫，同埋我又有啲服務用唔到就諗住轉俾媽咪衫外母衫咁，到我真係叫媽媽同埋奶奶嚟佢地都係揀唔到衫。我同啲sales反映反映幾次佢地先肯拎多啲款俾我地，到嗰陣奶奶就真係揀到衫。呢度想勸一勸新娘唔好幫屋企人揸主意去邊度揀衫，真係佢地去到一間佢揀到再俾錢都唔遲，唔好預先俾錢逼佢地揀衫，盞唔開心嘅。 佢地態度真係好差，試衫試唔啱佢地都會好唔耐煩架，冇咩耐性，對呢間感受都係麻麻地喇，都係行多幾間先決定穩陣啲。

當時我搵婚紗都係不斷咁睇唔同舖頭去揀，尖沙咀、太子、旺角嗰啲我都行過晒。太子麗都入面幾間店、尖沙咀某間婚妙店我都入去試過，係終於行到顯卓嗰時我未試就覺得啱！因為我入到顯卓一睇就覺得佢啲婚紗嘅款式好靚好啱。不過當時我哋會搵到顯卓真係全靠有個姐姐喺顯卓樓下嗰度派傳單，話佢哋已經好多年，叫我哋上去睇吓。原本我見要上樓又喺搵個姐姐派都怕啲款會好舊唔啱唔喺好想去，好彩真係上去睇一睇先，一睇就覺得啲款又新又靚又啱心水！佢啲款式好多都喺我行咗咁多間都無見過。 入咗去之後，Momo佢好nice咁招呼我同我朋友，又介紹吓佢哋公司已經好耐歷史，有幾多款衫同碼可以試，同埋俾咗錢之後就會有個裁縫姐姐跟住試衫同可以3個鐘無限試嗰啲。我哋覺得佢講啲嘢好實在，真係我哋需要知嘅嘢，唔會好似其他店啲職員，試嗰時通常只係會喺度講「呢套好靚呀，好啱你呀！」「我都係為咗你好咋，我見你咁趕都無時間試咁多間架喇」嗰啲好虛假嘅說話。後來，佢同我哋傾價錢嗰時都好好相與（原本8千幾講到6千幾），所以就決定用顯卓。試衫嗰方面真係好好，佢唔係限住我試幾多件，而喺真係好似佢之前講咁，俾個時段我喺嗰度任試。試嘅時候，我大約有講吓我想搵啲咩款式，佢又推介一啲佢覺得我會鐘意嘅款俾我。我覺得佢啲眼光都幾準，佢揀俾我睇嗰啲我都幾鐘意。我喺佢嗰度租咗三套晚裝同埋一套奶奶衫（後尾加多套婚紗，下面再講）。之後，我奶奶上去試衫又分開另外計3個鐘，唔會要我哋全部3個鐘之內試晒，真係好好！嗰時因為我怕太早去睇又會三心兩意想轉其他新款，所以我喺婚宴前兩三個月左右先去租衫，租咗之後都無改過其他款。不過要注意嘅就係佢哋係俾咗錢落咗訂先可以試衫，同其他店唔同。如果未俾錢的話，佢都可以俾你攞住啲衫喺鏡前并吓睇吓先。 成個租衫過程中間有段小插曲，就係我原本只係喺顯卓度租晚裝，但因為真係太過念念不忘喺嗰度見過嘅一件婚紗，就決定返去加單。嗰條裙真係好靚，喺一條好靚嘅小飛俠style咁嘅裙，肩位後面有兩條好長嘅紗拖尾，簡直係佢哋嘅鎮店之寶！我聯絡完佢哋之後，佢哋都肯幫我加單。不過到我婚宴前1個星期左右再上去做final fitting嗰時，佢哋竟然話「係咩？有加到咩？」，搞到我即刻勁驚，因為嗰條裙我諗住用黎做主打！於是我即刻去問個裁縫，因為之前喺佢應承幫我keep起條裙。佢就搵咗一大輪單，搵返係真係有幫我keep到，我先可以鬆返一口氣。不過除咗呢個小插曲之外，其他我都好滿意，啲裙嘅狀態質料嗰方面都同試嗰時一樣，好啱身同新淨。 最後，還衫嗰度真係超簡單，佢哋都係大約睇吓，唔會留難你。因為我之前著咗套婚紗喺烏溪沙個沙灘度影過相，都擔心會唔會話條裙濕咗或者黑咗，點知佢哋都無講啲咩，大約睇睇5分鐘左右就走得了。整體黎講真係好滿意，啲裙又新款又靚，仲好抵租添！