其實我一向做嘢嘅公司同Mira有contact，見之前合作開都OK，而且我當時時間都幾tight，所以見佢呢度有位就揀咗佢哋。不過，Big day前接洽嘅sales同事態度我哋就唔係咁滿意，好在另外一位負責banquet嘅同事就OK，所以big day當日都無咩問題。 因為Mira價錢都唔係平，但我哋傾嘢過程中間都有啲氣要受，所以心情就唔係太好同唔係咁滿意。主要係喺傾嘢期間，我哋有啲requirements想改同提出，佢都好straight咁答yes/no，而唔會幫我哋諗其他方法去試吓幫我哋做。我哋提出嘅要求好多佢都話「呢啲跟酒店policy我哋做唔到俾你哋喎」。其實我自己之前都有同其他酒店傾過，其他嘅sales都會話幫我哋問問之類，令我哋覺得真係caring好多。例如，嗰度包埋酒水，但我哋做完food tasting後覺得啲紅酒唔係咁OK，就想唔要酒換做其他嘢。一開始講完佢都話唔可以轉，咁我哋拗咗好耐最後都俾我哋轉，但中間嘅態度就受咗啲氣。跟住，當初我哋話擺16圍，但我哋因為一啲原因減咗，佢都問咗我哋好幾次會唔會加返。我諗可能佢係擔心我哋meet唔到minimum charge，不過後尾我哋upgrade咗個plan，換咗間大房同買咗啲餐前小食，所以都meet到，無問題。但係中間佢問我哋嗰時嘅態度就唔係咁好，亦令我哋覺得佢嘅態度同一開始嗰時唔同咗咁。我覺得佢做嘢係夠細心，但啲態度就比較掘，唔知係咪佢個人習慣答嘢係咁，但做客人聽起上嚟就覺得唔係咁好。我覺得或者佢可以試吓唔好答得咁硬，試吓幫我哋諗諗先，或者唔好咁直接咁答唔得之類會令我哋感覺好好多。 雖然sales team同事令我哋感覺唔太好，但要讚一讚佢哋event team嘅同事。嗰時我哋上去同佢哋傾返啲big day details，佢就主動送咗啲當日嘅泊車票俾我哋，仲話唔夠可以問佢再攞。另外，當晚event team都幾幫得手，我哋係用咗最頂樓嘅ballroom嘅某一間隔，賓客feedback都覺得場地同食物各樣嘢都唔錯。但當晚event我就唔係太留意到佢係咪有個staff長期跟住我，可能因為我太忙或者係我啲姊妹都有跟住我，所以成晚印象中好似只係見過1，2次左右就唔見咗。Big day之前我哋有做過場地testing，各樣嘢都OK，但可惜當晚播片嘅時候就hang機，播播吓之後播唔到，只係聽到聲無畫！（係我老公俾我嘅驚喜片段嚟）。到最後我老公去同佢哋埋數時講起呢樣嘢，佢哋就送返啲酒水俾我哋，都算係咁喇！（係我老公就傷心啲啦，播唔晒佢預備咗嘅片） 其實Mira場地同食物上都算OK，但因為佢哋sales team嘅態度唔係咁好，我自己就唔會recommend人用佢哋嘅service。

因為我哋30圍左右都唔少，所以我哋可以考慮嘅地方都唔係好多間。Mira其實唔係平，仲貴過帝京，但當時我哋去帝京做site visit時就唔係咁滿意。帝京site visit真係只係帶你去睇完個場就走，唔會坐低同你go through啲plan包啲咩。去Mira睇場後就覺得佢哋個服務態度好好，會有時間帶你去meeting room度好仔細咁介紹個plan俾你聽，感覺好用心，所以最後揀咗Mira。 跟我哋個account manager Fiona Cheng佢跟得好足，所以好多嘢都好放心。其中Mira值得一讚嘅係佢哋對當晚嘅食物好細心。因為我同我先生都有一個朋友唔食豬，但會食其他肉，佢哋就盡量幫我哋keep原本個menu，完全無再收我哋extra charge。有啲酒店會用個好簡單嘅方法就係俾素菜menu我哋，但Mira就唔係咁做。我哋去試菜嗰時交代咗呢個情況，主廚就出嚟同我哋講有一道焗釀響螺入面有豬肉，會幫我哋其中兩份走豬肉。個湯都幫我哋睇下會唔會當晚有隔離嘅banquet有合適嘅湯可以serve俾佢哋。之後當晚返黎feedback都好好，嗰2位客人都好appreciate咁照顧到佢哋。Fiona佢喺我哋big day嗰日有另外有2個potential客要睇場，都有事先同我哋講定，問我哋介唔介意先去做。除此之外，我哋個package係包咗試菜同埋試菜嗰晚有模擬返我哋嗰日個場係想點set。我唔知係唔係特別安排，但我哋試菜嗰晚同big day當晚都係同一個event host。因為試菜嗰時見過，big day嗰時就令我哋好放心，唔使再做ice breaking，同埋都算傾過吓當晚嘅嘢。 當日我哋3點鐘check in咗連酒席包嗰間酒店房，大家都喺嗰度休息。雖然都明白佢之前有event都早唔到交場俾我哋，但如果3點鐘已經可以俾我哋放物資喺場地嘅某個角落就好喇，可以唔使搬2次。 另外，嗰晚跟住我個妹妹阿moon好好，一見到我就好自動波咁叫我唔使擔心，會全程睇住我。有一個位我好appreciate佢嘅就係當晚有啲親戚嘅細路因為開始夜，眼瞓有啲扭計，佢即時喺自己衫袋度攞咗隻公仔出嚟吸引啲細路嘅注意，令大家都留意返鏡頭，我都估唔到佢咁細心！同埋佢自己好識執生，見我哋中間要有斟茶嘅環節就即刻幫我哋放好啲椅、茶具同跪墊，令成個過程都好smooth。 場地方面，當晚佢哋有個專人操作panel，俾咗歌同片佢哋就自動自覺幫我哋處理好。Event host之前亦同我哋go through過晒成個run down，所以大家都配合得好好。最後交尾數過程都好順利，因為一開始都傾好晒有咩要額外收錢。而且佢哋張單都列得好清楚, 所以無問題。最後就係，個場地真係好靚！