租衫我係搵IL MIO Wedding，我同我朋友係差三日結婚，所以做咩都係一齊做，我哋大家都唔太鐘意好花巧嘅婚紗，覺得呢間個Style啱就上咗去睇喇。雖然呢間鋪頭租衫價錢唔平，不過啲衫淨色得嚟又好有層次，而且套套衫都係老闆Kenny親手造，真真正正made in Hong Kong。同埋因為我係想一間舖揀哂婚紗同晚裝，而有啲舖頭可能係婚紗靚但係晚裝唔靚，呢間就兩套都okay，就連新郎禮服款式都唔錯，所以最終決定喺度租衫。 我喺Facebook like咗佢個page，可以免費試三件婚紗/禮服，然後join咗個package就可以任試。我覺得咁樣幾好，可以好隨意咁慢慢揀，唔似得其他舖頭可能又要約時間又限時。另外，佢哋嘅服務好好，會根據你嘅身型俾啲意見你。 後來我睇中咗兩件，一件就係佢嘅皇牌，係魚尾嘅，會貴少少；另一件就係散開，平少少嘅。而佢訂價係根據佢條裙整咗幾耐，多啲detail位係會貴少少。如果計價錢我本身係會考慮平啲嗰件，但係佢就話魚尾唔係個個著到，著到嘅話就一定要著，同埋佢套魚尾係成條都繡花，真係好考功夫。最後，我揀咗魚尾嗰條，big day嗰日影相出嚟嘅效果真係好好! 我之後都有建議佢整多啲唔同款式，例如而家好hit嘅旗袍咁。

呢間係我太太上網搵嘅，婚紗係佢地自己設計同整出嚟，會因應客人需要微調，而佢哋嘅老闆Kenny係設計師，有比好多唔同嘅建議我哋，態度唔pushy，雖然會比意見，試衫亦有試衫費，但唔會催逼客人。而且Kenny可以揣摩到客人嘅心意，例如我哋講咗喜歡嘅款式佢可以比到好多類似嘅款我哋。 拎衫嗰陣pack得好整齊，每一set用袋入好。還衫嗰陣亦check得好快。我太太著褂嗰陣著嘅紅色打底甩咗色，令件婚紗染咗色。不過Kenny check衫嗰陣十分好，佢望完之後就話洗得甩唔洗賠，佢仲話做得呢行都唔想收呢啲錢，好caring唔會趁機會恰人收錢。