Diamond Store係由朋友介紹，因為我有2位朋友都試過喺diamond store度訂結婚戒指，佢哋都覺得Diamond Store服務態度同quality都好。另一方面，我同我先生喺出面啲大舖頭唔係太搵到我哋想要嘅嘢，見到好多都係同一個模或款式去製作好多隻。當時我哋想買好plain乜都無嘅戒指，喺大店一啲都唔易搵，就算搵到個價錢都係唔合理地高，竟然plain嘅戒指係仲貴過有石嘅戒指！而且，我哋想要一對好獨特，無人會同我哋一樣嘅結婚戒指，所以我哋就都想幫襯有人情味的細店。 第一次上去嘅時候我哋都係因為朋友介紹呢間店就自己摸上去，去到嘅時候佢哋都同我哋講要預約先，不過當時我有pair朋友就係喺入面揀緊戒指，就俾我哋一齊睇吓。我覺得佢哋態度都好好，好有禮貌咁同我哋解釋要預約先上去，想一個時間reserve俾一對新人。我哋都好欣賞佢哋都好respect每對客人，想俾充裕嘅空間同時間佢哋揀，於是我哋第二次再上去就係事前預約好。第二次上去嘅時候感覺都幾好，唔會有消費壓力，不過都會有揀咗戒指款之後即刻落訂先有嘅優惠。因為我哋對戒指嘅價錢係少於一萬，所以當時我哋落訂就係即時俾晒全費。我哋都覺得OK，因為整戒指都要成本。當時佢哋幫我哋度尺碼時，發現我先生的手指比較幼，可以用少啲材料去造戒指，就好主動地提出減價，所以我都覺得佢哋好有良心嘅店舖。 至於設計方面，Diamond store唔單止俾我哋tailor made，更加係好用心咁向我哋講解如果我哋想要某啲造法，對戒指出到黎就會有咩效果。當時我上到佢哋店，咁啱見到一隻樹紋嘅戒指，我同我先生都好鐘意，覺得樹代表到生命, 所以最後我哋就決定戒指嘅設計係一半plain, 一半樹紋。另一方面，因為我自己唔鐘意戴幼戒指，所以我隻戒指係同我先生嗰隻一樣咁粗，呢樣又係其中一樣坊間難搵到嘅設計，出面通常係女仔嗰隻係幼身款。所以我好欣賞佢哋願意幫我哋整到一樣咁粗，我覺得咁先係真正嘅tailor made，真係幫你造到啱自己心意嘅款式出黎，而唔係大公司框架底下嘅tailor made。 嗰時大約預2-3星期後有成品，都只係靠佢手繪嘅設計圖去睇大約嘅design，中間唔會有模或半成品睇，所以都要靠自己去想像一下。到第一次攞到成品，有少少唔開心嘅地方係我喺whatsapp度同佢講過嘅一啲要求，最後喺成品度係無做到，有少少失望。另一方面，由於老闆佢話佢自己好年輕就已經開始賣戒指，我都好相信佢嘅專業，可惜最後收到戒指時，我嗰隻係好鬆，鬆到可以直接”fing”甩到出黎，所以一定要改size。我先生嗰隻都有啲鬆，大力”fing”的話都會甩出黎，但夏天隻手脹脹哋就好一啲。我向佢哋提出之後，佢哋都有道歉，然後就要求我加錢去改size，因為有石款通常一改就要全隻再造過。當時我都有同佢哋理論，因為係佢哋幫我度好再造，但宜家要我加錢再改。攞戒指當日，我有同佢哋約好時間，但咁啱又有另一位客人喺度。佢見要同我理論，就搵咗Fiona同我入房傾呢件事。同佢傾時佢話覺得我個設計好好，最後佢都願意幫我重新整過一隻新的，我唔啱嗰隻就俾佢哋放喺舖頭當Demo用，不過都要俾做戒指adjustment的錢。我覺得佢哋都做咗啲補償，但事實上我認為唔應該要我再俾錢。結果我俾咗$250再加$50的刻名費，所以最後係俾多$300先有一隻啱我手指size嘅戒指，中間嗰段時間仲要來來回回上多佢哋舖頭幾次。因為我放工較夜先可以過去，工作地點同佢哋舖頭又唔係同區，我都擔心佢哋要等到太夜，所以嗰段時間其實都幾困擾。我覺得主要應該係度戒指嗰部分出咗問題，可能因為度嗰時有個大圈圈住晒啲度尺碼嘅細戒指圈，我度嗰時就無甩出黎。我諗如果一開始拆啲細圈出黎度的話就可以準確點，因為最後個ring size由9.5號改到8號先啱，個差別都幾大。 雖然有啲小事件唔太開心，但其實戒指品質都好好，又好特別地用木盒去裝。木盒上可以刻字，我可以特別揀font send俾佢哋幫我印上去，我都好滿意。我覺得如果佢哋可以加設referral優惠的話，應該可以令到更多人推介朋友或家人去佢哋間店買嘢呢！

Diamond Store係朋友介紹嘅，因為佢哋自己對對戒都係搵佢哋造嘅，可以自訂款式，咁自己本身亦都有啲idea，所以就搵咗佢哋傾。我哋就冇逐間逐間compare過其他舖頭，因為唔想用咁多時間，我哋都係上網睇佢哋以前做落啲款，覺呢間okay就直接上去睇。 我哋對戒指係將我哋之前睇到鐘意嘅在款mix埋一齊。本身係想要扭紋款嘅，但係如果男仔都係扭紋款就好似有啲女性化，我先生又鐘意交叉款，咁我咪自己加多一劃咁變成交叉款。大行就應該唔會有呢啲款，而始終訂造我又可以揀要K金定白金，同埋有啲唔同嘅打磨面佢哋都可以幫我做到。 當初上去係約時間上去嘅，佢哋應該都係make appointment，約咗我哋應該唔會有其他客。佢哋都算專業，因為始終我都係行外人，我自己又有好多idea，可能又想做呢樣又想做嗰樣，佢哋都會同番我講「如果你想做呢個效果可能會冇咁come會易花」，都有俾呢啲意見我，因為我本身想光面嗰面唔做光面，想做啲好似石頭嘅凹凹凸凸，佢就話都會做到，只不過戴耐咗可能會變番平面，花嘅時候就會好覺眼，佢又提醒咗我其實可能簡單啲會好啲。 我自己其實有幾個要求，如果佢做到我都會喺佢度買架喇，同埋佢又做到刻簽名，個價錢亦都好合理，所以睇完之後就即刻決定喺度訂。外面啲鉑金對戒可能要去到九千至一萬蚊一對，呢度始終係朋友介紹，佢都俾咗好多discount我，最後埋單就八千五。 對戒指我係想盡量做幼啲，始終憑空想像我又唔知做出嚟會點，咁佢哋就好好整咗個模俾我睇過okay先，係真係可以戴上手試，都係幫到我嘅，因為如果做出嚟原來同想像中差好遠﹑唔夠幼又或者粗得滯，都起碼有個底，見到個模我就決定究竟照跟呢個模定係要改少少咁。我當初都唔知有個模嘅，係我好糾結嗰陣佢就話︰「或者我做個模出嚟你過嚟試咗okay，我先幫你做咪得囉！」 最後，佢哋都好快起到貨俾我，但係因為我要出trip就過咗一段時間先pick up到。一打開製成品係好滿意，始終見過個模，同想像中都係一樣！而且個包裝都好靚，係好似一本書咁，有我同我先生個名印落去，就好似打開本書見到有對戒指咁，好特別！