我自己本身鍾意Club One，因為佢哋專搞婚宴，場地好靚，入面裝修係歐式花園，唔會有普通酒樓嗰種俗氣嘅感覺，價錢又幾好☺️當時我哋早咗一年半去訂，但係訂唔到我哋最心儀嘅日子，因為呢間好多人book！佢哋嘅staff好helpful，劉生講解好清楚好有耐性，酒席細節好複雜，我哋聯絡過佢好多次，佢都不厭其煩解釋我哋聽，喺籌備過程幫咗我哋好多，解答咗好多疑難，跟得好足，無甩漏👍🏻！我哋上網睇見有人話過可以deal到discount，但可能我哋擺酒係好日、星期日，所以就冇乜畀discount我哋...我哋著重場地靚唔靚多過食物，婚禮當日有食到嘢但係唔多，我對食物冇乜要求，覺得OK！我哋擺咗三十幾圍，場地好大，仲可以擺得落更多圍數，不過視線可能就無咁靚。😍有朋友問我都會介紹呢間，口碑好重要！

K11呢間其實係今年新開既，佢deco係用tiffany blue，好靚，我confirm個陣係佢啱啱裝修好。我都有上過去一次，我係自己打電話上去搵既，我覺得佢地早期既個銷售手法係ok，但後期就麻麻，事緣我分三期落訂，我覺得佢應該要提下我落訂，但最後反而係我提返佢地落訂。另外，我問佢我地個wedding會係邊個in charge，但佢地話in charge個個要兩個月前先知，但都拍心口話會主動聯絡我講返，咁我都其實無咩特別野要夾，但佢都係wedding前一個月先搵我。 同埋其實中間都有少少唔開心，因為佢都幾last min先提我會唔會有歌要播，同埋我有買個deco既package，原來有送琴師，但佢就2個星期前先提我，話個琴師原來得3個鐘，其餘時間都要我自己播歌，我覺得佢地可以早少少提我，因為臨結婚前兩個星期一定好忙。最後我地換咗個日個in charge，因為我地係結婚前一個星期去夾rundown，例如進場用咩歌之類，但我個in charge係我同佢傾既過程中同我係wtsapp同佢夾既係唔同既，例如椅套我wtsapp揀紫色，但同事後來就話佢寫咗綠色，比如我地wtsapp話要自己揀歌，但後來啲同事就話係幫我地揀埋，但係其實我地係無咁樣講過既！另外，我先生就覺得有時候都未必即時睇到wtsapp，就叫佢打電話會好啲，但係佢後來都係無打黎，咁我先生就唔係好滿意，於是後來就換咗另一個同事，叫啊建，就好好既，都好smooth既，會提示我地呢一刻要做啲乜嘢。場地我覺得好好，因為我本身都唔係想揀大場地，close啲好似仲熱鬧，我唔洗搵其他deco公司，佢地啲decoration都已經好夠。可能始終係會所，啲侍應態度比較差啲，我覺得in charge要同炒散溝通多啲，雖然我知係有啲難既～～