一開頭我冇諗過搵大妗姐，去到後期因為我屋企係拜神比較迷信嘅，咁我地就唔想做錯啲中式野，因為我地自己都唔肯定。如果搞得唔好，怕爸爸媽媽會唔開心同怪我地，所以覺得要使呢筆錢，自己會比較安心啲，跟住先開始諗搵幸福大妗🤔。

果陣上網睇大妗，但大妗就比較難上網睇到好唔好，所以果陣搵黎搵去都唔知搵邊個好。有一日我去試婚紗，然後佢地就同我講佢地都有個大妗嘅package，但我地最後冇用到果個婚紗店，不過我就記得大妗個名同我個名一樣都係叫Cindy。因為依家網上睇其實睇邊間都話佢自己好架啦，咁啱呢間個名同我一樣，令我覺得好有親切感，就膽粗粗打電話去問😝。

一開始我係可以去觀塘個office同佢地傾，傾完都覺得個感覺OK，最後就搵左佢啦。佢地除左有中國傳統啲知識之外，仲有啲神學方面嘅知識，所以如果佢地講到果方面我就唔係好明。例如佢地會講到話杯茶入面要有紅棗蓮子，咁佢地都會解釋比我聽紅棗係點樣啊蓮子係點樣啊咁，所以都OK嘅。我覺得佢比我嘅感覺好和藹可親，好友善。因為有啲比較出名嘅化妝攝影會比較有架子，當我結婚已經好多野搞好stressful嘅時候，如果仲要deal with一個好stressful嘅vendor，成件事就會更加stressful。所以我覺得佢個感覺好親切，一啲架子都冇。

你問佢一啲好obvious嘅野，佢都好比心機咁慢慢解釋比你聽，會令我覺得好舒服安心🥰。結婚果日，佢就跟左我全日，會係我地要進行中式嘅儀式時先會貼住係我身邊。因為我老公係外國人，所以中西儀式都要做，當我地做西式儀式嘅時候就會有其他人負責，咁佢就會係附近但唔會貼住我。

我覺得佢地嘅專業知識都好足同埋唔驚有錯，基本上係交曬比佢地處理，尤其係一啲玄學方面嘅野☺️。咁佢嘅話係需要拜神，就要計個方向，同埋佢地應該有計過我地八字。我地出門果個位呢就咁個窗果度有個墳墓，我係結婚前幾日先發現先話比佢知，佢好好人特登山長水遠過嚟場地度幫我視察（我冇要求佢咁做）， 然後返公司再研究出神學上既解決方法， 然後再特登幫我準備特別用品，例如出門時用五色水晶灑地。 呢個舉動令到我覺得好安心。

我都有介紹呢間比身邊朋友啊，佢地會覺得唔需要大妗，不過行中式婚禮有需要嘅新人就會適合搵幸福大妗啦👍🏻。我可以話係我結婚嘅時候咁多野入面Cindy Man係我最滿意果個。好多身邊朋友覺得個價錢唔合理，不過因為佢地唔迷信唔傳統，所以就會覺得幾千蚊都係唔值。其實我用之前都有疑惑過，不過我用完之後就會覺得非常之值得去用，可以令自己同爸爸媽媽安心，因為我地係比較傳統同埋會拜神嘅人，而且佢地除左會令你安心之餘仲會比到emotional support我😇。

因為我老公係外國人，我老公同佢爸爸媽媽都唔識講廣東話，但係佢地又由加拿大黎香港，籌備婚禮嘅時候基本上都係我一腳踢，我老公完全幫唔到手。咁我仲要照顧埋佢果啲由加拿大同埋其他地方黎嘅親朋戚友，所以除左安排婚禮之餘，仲要安排好多其他野，例如住嘅地方、接機。佢地到嘅時間都唔一樣，我地結婚之後又要帶佢地周圍去玩啊，再去另一個國家再擺一次婚禮啊咁樣，果陣我係非常非常stressful。加上我爸爸媽媽唔係好support我嫁去外國，佢地仲會比好多難題我，所以果陣結婚前一個月我係暴瘦左十幾磅，好緊張，壓力又大，好多唔如意嘅事情發生😖。我婚禮前一日場地先同我講因為突然間有function，所以沒有時間畀我做佈置(但之前答應過我可以的）。 我果時好嬲但又沒有解決方法，只有崩潰爆喊， 最後同大妗呻，佢安撫我，比到很多 emotional support 我。果陣Cindy唔只係做一個大妗嘅角色，好多野唔開心我都可以同佢傾訴。我好記得我結婚之前果一個禮拜我基本上每日都同佢whatsapp，佢真係有做埋心理輔導過我，聽我呻，令我冇咁stressed，可以安心啲🥺。

我地結完婚之後同Cindy都保持住朋友嘅關係，我次次返香港都會見佢，同埋之前我係加拿大買樓有啲玄學嘅野問佢，佢都會唔收錢咁答返我。如果我身邊有人需要大妗我都非常推薦佢，只不過依家好多人都覺得唔需要請大妗姐。但我覺得呢個錢係值得使，結婚果日唔需要佢痴住我嘅時候佢都有幫手招呼啲賓客，齋係呢樣野我就覺得好似請多左個姊妹咁🥰。同埋令到四大長老比較安心，佢地都好中意個安排，我爸見到我上香即刻安樂晒。同埋Cindy果陣都有同我解釋話點解新娘出門嘅時候唔可以落地，如果唔係佢我都唔會知呢啲野，信唔信都好，做咗就好過無啦😆。

我搵嗰個大妗姐Cindy 吳太係上網見到啲報導搵到嘅，佢真係好好。開頭我第一次搵佢，佢約咗我去佢個工作室度見下，佢話叫我見下傾下睇下鍾唔鍾意先再決定，唔洗咁急。 佢個工作室喺觀塘，我第一次上去都傾咗好耐。佢好nice，問得好detail。因為大妗呢行都有啲尷尬就係各處鄉村各處例，信仰又可能有唔同，咁呢方面佢都問得好清楚。佢都會問我有冇嘢介意，又或者想跟足傳統啲定點咁。佢都識啲術數咁，又會幫我哋再睇下啲時間咁。咁然後我哋confirm咗之後，佢又會同我哋各自嘅父母再傾一次，親自問下提點下佢哋會唔會有咩習俗想做或者介意嘅地方，我諗佢每個都傾咗成個鐘。中間我都驚有嘢甩漏，問佢可唔可以同我同奶奶開個whatapp group，咁佢都OK。我哋中間有嘢問，佢都有覆，仲話有咩唔明就隨便問佢啦，佢點都會答唔洗驚煩到佢，最緊要搞到件事，佢真係好好。 而Big day當日實際行起上嚟都好OK，因為之前都已經溝通得好好，成件事都好smooth。佢啲脾氣又好好，就算人咁多都唔會手腳亂，會講清楚一陣做啲咩，叫我哋睇佢signal。佢直頭完咗之後仲會同我哋聯絡，有啲屋企嘅嘢都可以同佢傾，好似朋友咁。