我哋上去同佢傾嗰時，佢話佢會安排埋化妝但無得試妝。我諗住佢係專業嘅唔試都可以接受，就OK咗。（點知化完之後我真係覺得個妝好唔得！） 講返影相嗰朝8點鐘我已經上到去佢studio開始化妝。不過Billy佢同我哋都無乜交流，我有我坐喺度化妝，佢有佢坐喺一邊同助手傾嘢，又唔會過嚟同我哋講吓之後影相啲嘢。然後，之前佢原本就話嗰日應該有啲陽光可以喺studio度影下先再出去影戶外，但嗰日化完妝之後佢就覺得時間唔夠，於是就無喺studio影。我覺得既然化妝師係佢搵返嚟，佢應該知大約要化幾耐㗎嘛，而且都係喺補多幾張相啫，所以都唔係好明。 我哋第一個景點就係返我哋2個嘅小學度影，之後去水浪窩，最後就返studio。 影嘅過程佢知道仲要去水浪窩度影戶外，但佢就喺第一個景點度影咗好耐，到我哋去到水浪窩嗰時已經接近入黑，我覺得佢啲時間掌握得唔係幾好。跟住影相嘅時候，喺個大環境當中又唔係好知佢想我哋做乜。佢有時叫我哋「對望吓」，或者「望吓嗰邊」，我哋就跟住做同hold住，但好多時都唔係太清楚要hold幾耐或者點。有次佢就叫我哋兩個自己玩吓，我同我老公又唔係影開相，真係唔知即係要做啲乜嘢，結果我老公呢啲呆呆地嘅人就企咗係度。我覺得如果你個風格係想話影到嗰2個人平時嘅風格，咁最好就係俾錢之前講定佢係唔會俾太多指示點影，主要睇佢哋表露啲咩，等我哋都可以諗下啱唔啱自己先。因為我真係覺得俾咗3萬幾蚊信晒你係專業，會指導我哋行哋點做點影先啱，但最後竟然係唔知自己做緊咩又唔係太知佢做緊咩咁樣。我覺得佢嘅指引程度要再清晰啲先得，例如如果以十分為滿分，佢依家係一分而真係要調整到去八分先算得上係OK。 另一方面，唔知喺唔係性格係咁，佢真係同我哋唔多交流。當然「我哋要出發喇」，「我哋要去邊度影喇」嗰啲就有講啦，但其他交流就真係無乜。就算我哋一齊搭緊車去另一個地方影或者影相嗰時，佢都係同佢助手傾談多過同我哋有交流，有時我直頭覺得好似我哋唔係度咁。 之後到我哋攞返啲相，我覺得佢影出嚟啲角度真係唔係好靚同埋佢執完出嚟啲相唔清，好似好懞咁。佢俾咗成千幾張我，但每一個鏡頭有五至十張係同一個位，搞到我真係好難揀得落手。我諗住就算我哋唔識影，佢都會個人走動吓幫我哋換吓角度，所以見到啲相真係幾失望。其中有張相我同佢講唔想執到張相咁黑，因為佢執到張相好迷幻，佢好快就再執過俾我，但我依然都係覺得效果好一般。其實我嗰時都有SEND篇嘢同佢哋講我唔滿意，執相嗰個人負責覆就話送多5張相放落相簿，但我真係心諗要揀多五張我覺得滿意嘅放落去都唔容易。我諗主要嚟講佢真係要一開始同啲客人講清楚佢個影相風格係唔多指示同埋要同客人多啲溝通先得。
