因為我老公喺Four Seasons 同我求婚，對呢個地方有情意結，而且我地覺得職員服務態度都好好，所以就揀返佢地。

佢地嘅場地無柱位，不過其實我係無睇場～因為無人同我講過可以睇。到結婚當日有另一個職員知道原來我無睇過場之後，先問我地點解唔安排睇場？可能之前嗰一個職員覺得唔同客有唔同需要，不過如果當初佢早啲話我知有得睇場咁就更好～雖然我地無睇場，但係枱布、枱花同櫈啲顏色之前都有得揀。佢會問我地會想點樣去配搭，好多嘢都有得比我地自己揀～

我地big day當日服務嘅職員都好好，而且菜式方面都有好心思，例如蘿蔔會砌成心形，呢啲gimmick嘢都會令人記得～

其實我所有野都好趕急，開頭我地係想揀Repulse Bay，但因為食既野唔啱口味，後來揀咗Four Season。 佢地服務態度真係好好！同我傾既人叫啊Ming，佢唔會故意調高黎賣，好多野都好flexible，例如因為我地話四季好貴，佢就即刻比咗三個套餐比我地揀，咁但係當然啦最好嗰個一定係貴啲，咁我地就話最top個個太多野食喇，因為講真最後啲人都未必會食甜品。其實本身成個package係固定咩野食既，無得轉，但後來同佢地傾咗幾次佢地都話明白我地唔想浪費同埋想用少啲錢，佢竟然幫我重新整過個package，我地就由本身最貴既package變咗中價個個package再加多800幾蚊就得，本身個中價既package已經好正，出面其實唔會咁樣幫我地安排，佢地真係肯同我地溝通～～ 整體所有野都好食，服務態度一直由試菜到最後都好好，食物質素無變過，佢仲要安排咗個三星米芝蓮大廚比我！個個都食到好開心，全部都食曬，啲菜式真係好有水準，無一個賓客話唔正，真係覺得自己好lucky！！！