我哋之前有去過Hotel Icon一兩次食buffet，順便望下個場，啲嘢又好食，見到個場四四方方幾骨子，好靚好大而且冇柱。之前都有睇過其他場例如W hotel嗰啲比較新啲嘅酒店，因為好多舊酒店樓底都好矮。我哋未走到過去港島睇，因為一睇到Hotel Icon就好鍾意，唔洗咁麻煩再搵。 我哋係直接上去Hotel Icon傾，因為我哋book嘅時候Hotel Icon都未擺婚展，到我哋book咗之後過多一兩次婚展佢先開始擺。我哋一開始係同Candice溝通，後尾佢resign咗就pass咗俾Christy。佢哋handover過程都順利，因為我哋好早confirm，16年11月結婚，我哋15年3月就已經confirm咗booking，所以中間有一段時間係冇聯絡過酒店嗰邊；再到3、4月嘅時間先再聯絡返酒店，知道原來Candice resign咗，即刻就有另一個manager Christy follow我哋嘅婚宴，同埋每一次email來往都答到我哋想知嘅嘢，亦都好快回覆。Christy 好 helpful，例如臨結婚前一星期，我哋想睇多次個場啲燈嘅顏色想揀咩、試音響呀、歌同片嘅Format等等，就算當日有人move-in緊，佢都特登spare到個時間俾我哋試，提我哋好多，make sure當日一定冇問題，好肯幫我哋。 佢哋試菜做得好謹慎，試菜既時候會有一張form俾我哋，list晒啲菜式名，隔離有個格仔俾我哋留comment，好似當日有個焗蟹蓋我哋食完半個都覺得好「漏」，同佢哋講完之後到big day真係改善左，冇咁濃同咁濟。但係選擇方面有啲美中不足，例如我覺得甜品方面麻麻哋，我哋話想加錢轉其他嘢，但佢哋都轉唔到，而且menu上面想加錢轉啲嘢都幾貴，例如有一味炆鵝掌，我哋覺得都幾dry, 咁就問下可唔可以加埋冬菇，點知原來加埋冬菇就要加成$5佰幾6佰蚊！咁覺得原來咁貴就唯有算喇。。試菜時食嘅甜品有糯米糍同合桃酥，合桃酥ok，但係我哋想換走糯米糍，因為好似咬緊舊膠，我哋想轉做紅棗糕但佢哋冇，後尾覺得大家試之前嗰幾味都食到飽，冇咩人食甜品所以冇轉到。 佢哋價錢算中上，不過我覺得係一分錢一分貨，呢個場哋加上服務同食物質素，我都覺得物有所值。我哋好怕酒店得個樣但啲嘢唔好食，但呢度真係好食。我對服務人員嘅態度都算非常有要求，但佢哋嘅部長同工作人員都好nice，當日冇任何唔開心或者半點想皺眉，成個過程好enjoy，幫手拖衫嘅姐姐都好好。而且佢本身話只係free五個車位俾我哋，但最後好多賓客揸車黎，最後酒店都free左俾佢哋。 不過，如果move in time可以預早啲就更好。當日本身同我哋講話5點可以入，雖然都早咗入，但如果可以預4點半move in就更好，因為我哋當日6點3已經註冊，冇咁大壓力唔洗咁趕。不過當日去到見到4點幾就已經set up緊，都輕鬆哂，其他嘢都跟得好足。最後找數都係明碼實價，冇多冇少。雖然價錢都有收返咁上下，但佢哋送咗其他唔同嘅嘢俾我哋，例如送咗個photo booth同埋細backdrop俾我哋，都方便咗我哋，等我哋唔洗出去再搵其他公司幫我哋處理。

我嘅big day前大約10個月落訂，而confirm呢度之前其實都睇過帝京酒店，覺得個場都幾靚。不過，我哋compare返兩邊價錢，其實都好相近，所以就揀返Hotel Icon，因為尖沙咀location較好。而且之前有聽過朋友話食物質素好，去過睇場都覺得幾好靚，所以就confirm用Hotel Icon。 我哋嘅婚宴主要係由Katie負責，包括睇場同埋之後同我哋開會傾細節。雖然起初都約咗幾次先約到時間去睇場，但佢都會盡量就我哋放工時間。我哋去睇場嘅時候，Katie就介紹啲plan俾我哋，我哋睇場後就俾埋deposit。我覺得Katie佢好有耐性，因為我哋其實都好多問題問佢，佢全部都答得好用心同仔細。 由於我哋之前都只係上網download其他人啲婚禮template rundown去用，好多細節嘢我哋都無留意要諗埋，Katie佢嘅經驗真係好幫到我哋！好似起初我哋諗住證婚時間係6點定6點半，佢就提醒返我哋到時啲賓客可能唔會咁早就可以嚟到，俾咗好多好具體關於當日嘅細節俾我哋，尤其喺當日嘅時間安排。又例如同decoration公司夾製作時間，幾耐前可以入去準備之類，佢都提咗我哋。最後證婚同進場嘅時間都係靠Katie提議我哋要留多啲時間。 到咗婚宴當日，Hotel Icon嗰邊都盡早俾decoration公司入去佈置，所以都好smooth。佢哋嘅Banquet manager康仔就一直幫我哋留意住幾多賓客到咗，然後依住個入席率嚟提醒我哋差不多可以換衫或者進場。我覺得呢樣嘢真係好幫到我哋，因為當時嘅情況我哋真係無可能留意到有幾多賓客已經到咗。之前我哋有提過可能要有一至兩圍flexible，然後當日佢都有主動嚟同我哋傾有大約一圍空咗， 會唔會考慮減圍數。 我覺得Hotel Icon個台好靚，喺台上面影相都好好，唯一係啲朋友feedback個photo booth唔係咁好，不過就唔知係咪因為場地出面暗定係相機Quality唔好。嗰個photo booth係酒店package裡面包嘅一部好似貼紙相機之類嘅嘢，又不過我諗可能部機本身都唔係太好，我啲朋友話好似影到滿面油光。 食物方面，我哋無做menu tasting，而且嗰日我同我老公都無乜時間食嘢，但係屋企人feedback都話好食。場地嘅質素方面，啲賓客都覺得好滿意。另一樣令我好有印象嘅係負責head table嘅嗰一位waiter先生，佢真係好好，主動提我哋要唔要補返斟茶。到敬酒嗰時，佢一直都陪住我哋。當佢見到我啲屋企人同啲賓客傾耐咗，就會提我哋等埋先一齊去下一圍，我覺得佢lead得好好。不過我唔記得咗佢叫咩名，但佢身為男士都咁細心真係好意想不到，都好感謝佢敬酒時一直照顧我哋。整體嚟講，成個婚禮我都覺得都好smooth好滿意。