我哋當初都有去婚展睇過，不過發現好多價錢都計得好tricky，所以我哋決定諗吓大家去過嘅婚禮當中有邊幾間係比較鐘意嘅去縮小考慮範圍，如果唔係真係太多太難揀。傾過之後發現我同我先生都好鐘意Hotel Icon，我去過咁多個wedding其實令我印象最深刻就係Hotel Icon。 於是我哋就去咗佢個booth度搵佢傾，第一次見Hotel Icon嘅sales Karina都好nice，一坐低佢就俾咗兩支水我哋，又有喉糖，成個感覺都好賓至如歸咁，又會用ipad同我哋介紹。其他酒店例如Langham都係企喺度同你講，JW Marriott仲要你等。 之後婚展完咗就交咗俾第二位同事Emmy follow-up，好多嘢佢都有keep住提醒我，例如提我哋俾deposit﹑有咩要揀 (menu﹑主菜﹑centre piece等等)，可能好多嘢我哋傾完都要番去商量吓先，佢都好有耐性咁send email提我哋，去到每一個timeline佢都會提我哋，令到我哋成個過程輕鬆啲，而佢喺big day當日都有出現。 當日嘅音響配套等等都係非常好，啲音樂本來係要預先俾佢，但係我就得個Apple music playlist，唔識點download俾佢，於是我問佢我自己帶部Mac俾佢播歌得唔得，佢都做到俾我。佢係可以好flexible，唔會一定要你跟佢哋一貫既做法做。 Hotel Icon啲嘢真係好好食，overall啲guest嘅feedback都係positive。佢有啲staff係PolyU嘅學生，但係佢地對學生嘅表現比其他staff嚟得更著緊，所以都冇擔心過。 最後想講講個新娘房，都知道當日好多人會喺嗰度出入，但係佢得一塊簾，而塊簾係爛咗，變咗換衫會冇咁方便，不過後來佢都即刻搵個夾同我夾住，補救返都算okay。