佢地嘅價錢好有意頭，包埋酒水加一每枱＄12888。之前搵過Mira, 沙田Hyatt, Icon, Royal Garden，而揀佢既原因都係因為佢地點就腳方便，但係比同區其他酒店抵。呢間冇擺婚展，所以我係send email問，負責嘅員工係Kary，當我決定咗confirm就又另一位同事Eva跟進。Eva都跟得好好，所有新人要去考慮嘅嘢Eva都有俾建議，仲會講吓唔同客人係呢個情況會點做俾我哋做參考。 以呢個價錢嚟講，食物質素算係okay。有一個小遺憾就係我本身想將其中一道菜轉做蟹鉗，但係Eva睇漏咗我封email，去到最後到Big Day時先發現原來冇改到。其實我自己都有overlook，因為confirm菜單嘅時候係要double check返啱唔啱，但係當時其實自己仲要籌備其他嘢太忙，所以佢哋冇改我都冇為意。其實都可以話大家都有責任，而如果大家都小心啲嘅話呢個錯誤都應該可以避免到。當晚Eva冇當值，而當值經理發現菜單有錯都有直接聯絡返Eva，check返知道有出錯之後都有補償返，送咗免費早餐俾我哋。呢個跟進工夫都好好，雖然都改變唔到啲乜嘢，但都算俾到好好嘅印象我哋。 整體態度好好，我去過差唔多級數嘅酒店，但好多時waiter係part-time所以唔太專業，不過今次就所有員工都好好，因為我有特登問返賓客每枱嘅侍應O唔OK，得到嘅評語都係正面嘅。 另外當日貼身serve我太太嘅妹妹真係好好，因為我太太身形問題，令到衫好易唔稱身。但呢位同事無論係打理衣服、照顧飲食，唔同場合都handle得好好，所以我太太讚不絕口。