想要搵一間可以擺到50圍『事正』既場地真係唔多。例如去到Ritz Carlton，我就覺得佢一定擺唔到，就算擺到都會好逼，加上Ritz個場中間有條巨柱，所以當晚一定會有賓客睇唔到，同埋佢地間房出面個空間仲大過裏面間房，所以用佢地既話所花既錢去decorate個foyer位一定好貴。都唔係話Intercon個場全部都好，因為音響AV真係唔得，應該就係啲機既質素唔夠Fine。例如播video，無論我地個video幾High Den.，播出嚟都播唔到High Den. 既效果。簡單講，好似我地條片明明係High Den.，播咗出嚟都好似係VHS咁。至於出面個reception area就其實可以光啲，加上酒店嚟講都係算舊，無乜點翻新過，相比Grand Hyatt，Grand Hyatt個場就真係翻新過。如果我地唔擺decoration，佢地就咁既design就真係好普通，硬件真係舊，好似30年前麗晶時代咁。即係你酒店問得我地消費者攞個top price，酒店本身真係可以做好啲。 食物質素真係好好，有賓客到今日都仲讚緊話當晚好好食，真係好少咁大既酒席啲食物可以做得咁好食。都要讚佢地試菜真係做得好認真。Book既時候搵Vincent，而book佢地會包埋試菜，佢地唔單止味道會跟得好足，就連上碟時既presentation都會同妳跟埋。Vincent係試菜時都响到，佢同我地講話每一道菜上碟既時候都要靚，因為係酒店既standard嚟既，所以有comment 就同佢講。咁好啦，試到帶子同露筍既時候因為覺得一粒粒散修修，咁問佢可唔可以搵個籃仔或者雀巢載住啲餸，佢又照做俾妳唔會話要加錢。最後出嚟效果真係好靚。其實detail到揀餸都會俾意見妳，因為我地婚宴係响12月，試菜時佢地已經預先同妳講話因為12月天氣會凍，賓客應該會想食熱嘢，佢地都會主動建議妳將冷盤改成另一個熱盤，所以食物既每一項都會令妳覺得佢地好professional。 佢地會安排一男一女，新郎新娘每人一個assistant由頭到尾陪住我地幫我地。嗰assistent因為熟習個地方同環境，所以真係仲有效率過個伴郎同個伴娘，好體貼。例如由開始影相，因為好多賓客老人家，需要我行來行去，佢會好細心幫我拖起條裙，make sure我唔會俾人踩。又例如擺完酒，佢又知道我攰，佢會主動俾對拖鞋我著，然後幫我攞返對高踭鞋入去新娘房同埋其他既嘢pack埋一齊送返去我房；口渴既時候又會俾支飲筒我飲嘢免得整親我個妝。到我換衫時都好細心，佢留意到我想食少少嘢，佢會幫我攞碟食物入嚟新娘房到俾我邊食邊準備。我都唔知酒店有啲咁既服務，而佢地又真係好幫到我！加上Intercon個場又大，加埋枱既時候真係好需要人幫。有呢位assistant不單止幫我攞住條裙，佢仲會帶住我地行，免得有邊到行漏咗。又見我地好多禮物，佢會幫我地攞返入新娘房然後鎖好俾返條匙我地，唔需要我地擔心。知道要斟茶佢又會主動咁去準備好晒啲嘢。 啲detail位仲包括佢地知道photographer要食啲嘢免得佢地婚宴時侯無機會食（或因為要食無影到相），所以响rundown到已包括會check埋妳幾時俾photographer食啲嘢。選好時間就會準備2個menu，咁揀好之後就會set張枱俾佢啲好好咁食返餐先免得阻外拍攝，而攝影師又唔駛挨餓。