我哋揀酒店嘅時候好多都full哂，而我哋本身都有啲要求，例如我哋擺三十八圍，人數真係比較多；另外都想喺九龍區，最好尖沙嘴區擺，因為對屋企人嚟講都比較方便，加上又想有view，所以最後我哋揀咗Shangri-La。另外加上我哋有啲內地親戚，Shangri-La可能比較為人熟悉，同埋又grand啲古典啲﹑樓底又高，啲嘢又真係好好食，真係有米芝蓮質素。 佢係包一晚酒店嘅，會將我哋啲嘢用行李車幫我哋拎上房。另外因為當日都好忙，冇咩時間食嘢，佢就幫我哋將食唔哂嘅嘢翻熱然後拎上房俾我哋食，都幾周到。 服務方面，諗番起最初sales嗰位同事有少少倔，好似冇咩商量咁，但最後有啲要求都滿足到，所以都OK。至於當日嘅服務有一點想講就係個部長好似懶懶閒咁，指揮得唔係幾好，同埋嗰位負責拖裙嘅女仔成日唔見人，好彩我啲裙尾唔係好長，如果唔係就麻煩喇。

我媽鍾意Kowloon Shangri-la個ball room冇咁多柱，雖然之前都有睇過Island，但Island就有啲柱，同埋會係檯面分餸，無咁好睇，所以我媽咪就唔鍾意Isalnd，加上個場都細啲，所以最後都係揀返Kowloon Shangri-la。 負責安排嘅sales manager Jason幾好，例如我同佢negotiate一啲項目，或者某啲位想換嘢嘅時候，佢都肯幫我哋去爭取。 野食方面，我好鍾意個蟹蓋！之前去試菜已經覺得好好味，當日我都專登安排咗空檔時間去食，但喺上菜就有啲慢，令成個晚宴去到12點幾先完。