其實佢個價錢係好相宜嘅，一萬蚊就包女仔3件衫男仔2件衫咁樣，同埋都有包車…
現代經典攝影係我去澳門嗰間攝影公司黎嘅，我當初揀佢都係機緣巧合嘅事情。因為我本身諗住淨係搵朋友影一輯就算，但後尾我就去左婚展睇。因為會展個婚展呢唔係好多公司做澳門，點知我一睇就有個做澳門嘅，咁啱佢就嗌我過去介紹澳門嘅分店，所以就坐左去聽。
其實佢個價錢係好相宜嘅，一萬蚊就包女仔3件衫男仔2件衫咁樣，同埋都有包車啊，送船飛啊，又包相簿啊，所以個價錢係十分之好嘅😆。唯獨是個售後服務呢就相對令到我地好唔滿意啦，其中一個唔滿意嘅位置，就係本相簿佢地會用好似magazine咁嘅格式去做，個magazine格式上面就會有啲字，咁佢地就想將啲字都改埋做英文，個同事一路都係講緊「得啊冇問題」，以致到我就以為好簡單。佢提過係比一個psd檔佢去做，咁我當初聽呢三個字我唔知發咩神經以為係pdf咁樣啦，因為聽到係p字頭就以為係pdf。我就以為總之就係比啲文字佢，佢就會幫我整好晒。後尾我發覺到佢真係講緊psd，係photoshop嘅一個檔嘅名稱黎㗎喎，跟住佢地比個版我睇嘅時候，先發覺完全唔係嗰回事，就咁times new roman咁擺上去。喂救命，唔係咁樣衰丫嘛。令到我勁o嘴🥴。如果佢地係個服務員，應該要提下人psd檔即係photoshop檔，佢唔係一句「得啊冇問題啊」就敷衍左我地。佢地完全冇design咁比個版我睇咁都做得出嘅？唔望下呢件事整到幾核突嘅咩。其實我係炆左嘅，我之後就要出去再搵啲身邊有做design嘅朋友，變相麻煩左我同埋我個朋友去design過啲字，然後先再比佢。原本本身係諗住結婚前攞到本相簿，就可以攞比啲親戚朋友睇，因為嫲嫲都好心急想睇。但就係因為佢少條筋冇提醒我，就搞到我冇得新年前攞到本相簿，咁新年之後就開始有疫症，變相到依家呢都仲未見到本相簿。未見到個update左嘅版啦，更加唔好講有個真實hardcopy咁😟。
因為我地呢啲返工人士，梗係放工夜晚去架啦，嗰位同事一路比我地嘅感覺就係好趕收工咁樣。我地第一次去揀相嘅時候，直頭好似好唔耐煩我地。睇多幾次就會話「其實都差唔多姐，先生小姐你地快啲揀啦」，即係比說話我地聽嘅時候，我就會覺得個售後服務真係超差😖。
第三件事就係影相嘅時候啦，其實新人自己已經好緊張，但係佢就係咁催啊，又係講埋晒話咩「呢條同嗰條其實都係差唔多姐，你地快啲揀啦」我就覺得啲態度唔係咁差啊嘛。同埋第二樣嘢就係，其實佢地幫我化開個妝我唔係咁滿意嘅，對住個大太陽，對住個咁勁嘅攝影機係要化咁厚，係要化咁濃，或者條眉係要化咁粗。但最大嘅問題係我係從來都冇過皮膚敏感，但係用完佢地嘅化妝品，即係佢地幫我化完個妝後，我隻眼敏感左一個星期😢。
不過佢咁樣嘅價錢，啲相個outcome又係靚嘅，所以我又唔會比佢地太低分，比佢地3.5啦。嗰1.5分真係全扣係佢個售後服務度，佢當初sell我嗰啲野啊，一路去澳門前嗰啲提醒啊其實真係做得好足架，嗰個同事真係好好架🥺。一路跟開我個同事係ok嘅，去到影完返黎又咁樣，返到黎香港個同事又咁樣，就令到我覺得啲售後服務好差。
