我地之前買咗本2017年嘅婚姻雜誌嚟睇，就睇到話Thomas係最寫實嘅攝影師，話佢可以影低新人最自然嗰一面。咁啱我老公個朋友之前都想搵佢影，睇過佢啲相都覺得唔錯，所以我地就膽粗粗搵咗佢問下有無期。佢覆返咁啱又有期～～ 就搵咗佢！

照片出到嚟都真係自然風格，我地好鍾意！不過有啲我覺得好得意嘅位，佢就無影唔到，例如係Four Seasons嘅旋轉樓梯，佢就唔記得咗影。我都明白當日真係好rush，所以唔可以話全部嘢都影到晒，始終自己比較完美主義，都唔怪得佢～～ 另外，我地好欣賞Thomas幾真情流露，係一個幾感性嘅攝影師。我地big day前一日見過面，當時我同佢講我係一個唔會喊嘅人嚟，但因為佢係一個幾有感情嘅人，所以係big day當日反而好多位佢都可以觸動到我地。

Heather係屬於Poem嘅其中一員，而Poem係呢幾年新開，將幾個出名少少嘅攝影師group埋一齊。 當時我家姐搵過Heather影，我覺得佢啲相好靚，所以就諗住搵Heather 影pre-wedding。 呢輯相好符合期望。我搵Heather分別去咗我同老公兩間中學影相，因為中學時期係我哋一段好美好既回憶，加上我哋覺得pre-wedding應該係去返我哋一齊經歷過嘅地方影，而唔係去啲無乜關係嘅地方(例如中環…)，所以最後就揀咗去我哋中學同大學到影preweddding。咁啱我同我老公都係同一個屋邨出世，所以夜晚又去埋嗰到影。呢啲地方都係屬於我哋嘅回憶，所以大家都好投入去影呢輯相，影得好開心！ Heather影得好快，好容易掌握到景同角度。因為我係第一次影pre-wedding，所以好多時我都唔知應該點做，當我話想影某個景嘅時候，佢會幫我warm-up再影，個效果令我好滿意！其他人睇完呢輯相都話影到我中學好靚。 其實呢輯相好多嘢都唔包，衫係自己㨂，而妝係Poem幫我搵嘅。我冇試過妝，個化妝叫我whatsapp返套衫俾佢，又問我有咩意見，之後就send咗啲sample問我點睇，好多選擇。因為我哋有著返校服，但另一套係婚紗，佢仲幫我諗埋點樣係兩套衫之間方便『極速』換造型，其實只係個髮型唔同咗，但個feel又會match返套衫，真係好厲害！ 另外夜晚我就著住晚裝响樂華邨影相，因為感覺比較young同活潑，所以個髮型就做返可愛型，我冇諗過化妝可以咁到位，所以真係好感謝化妝師可以幫我做到咁適合嘅造型！