其實我哋結婚嗰日嘅年幾前已經book好，因為吉日唔多，我又一定要揀星期六，等大家嚟飲都仲有一日休息吓。於是我去東海薈睇過價錢幾好，啲景都靚，所以好早就已經訂定。 初時我哋訂嗰時新娘房無廁所，後來我哋再上去俾訂金同埋傾吓啲細節，傾傾吓佢哋嗰邊就同我哋講會裝修整返個廁所。我相信應該都有唔少人覺得佢哋個場好，但唯一缺點就係新娘房無廁所，佢哋先會咁樣裝修加返，唔會只係因為我哋嘅。 場地整個area都好有木嘅感覺，好舒服，唔會話太過華麗嗰種。嗰排又近聖誕，樓下有啲聖誕裝飾，加上夜晚幻彩詠香江啲光反射過嚟都幾靚，我個人覺得感覺都唔錯！呢個場唯一我覺得有個小缺點就係台附近有２條小小嘅柱位，有啲圍數會睇得唔係咁清楚，但我諗呢啲係建築架構問題就應該改唔到。 服務嗰方面我都覺得好好，啲人都好nice。因為啲親戚朋友都有帶小朋友嚟飲，都驚佢哋悶，所以我之前都有問過會唔會可以加錢整部爆谷機之類嗰啲喺門口。估唔到佢哋都好爽快就話「爆谷機？你想要呀？好，安排俾你丫，無所謂嘅」。於是嗰日啲小朋友都好開心，因為有爆谷食，仲即場睇住啲爆谷爆出嚟。除咗爆谷之外仲有啲餐前點心，大家feedback都話好食。我哋最後25圍，都無諗過咁多，佢哋幫我哋安排到啲枱密啲，但喺個場地都唔會覺到侷促。佢哋有２邊台，都幾好。我覺得嗰日各方面嘅時間配合同安排都好好，其中有個小插曲就係我有個兄弟俾人當咗係服務員，哈哈。