本身我自己極之麻麻地擺酒，只喺為咗屋企人先咁做。我老公唔鐘意酒店擺酒，覺得嘢食唔好味，因為大部分親戚朋友都住港島，所以都希望喺港島擺酒，最後就搵咗美心。佢哋有個陳經理好nice，會同我傾返咩日子得，當我hold咗場之後會提我幾時要俾錢，提醒我好多唔同嘅日子時間，令我知道個場幾時得。 唔知幸運定不幸，原先想book但被人book咗嘅隔離場竟然撻咗訂，陳經理就特登開多咗少少地方俾我哋，因為當時我哋爆咗圍數，本身預廿五變咗差唔多廿八，其實一般酒樓未必咁好，好多謝佢哋令我哋地方鬆動啲。整體佈置亦迎合到我哋要求，例如我哋想某個時間之前可以用到個場，佢哋又真係可以ready到俾我哋，呢點其實好重要！ 另外啲姐姐好pro，聽返朋友講啲姐姐好開心，有幾圍仲喺咁同啲姐姐玩，可能佢哋見慣大場面，所以可以好輕鬆嘅處理。上菜嘅時間非常精準，夠熱又好味。 陳經理另外亦俾咗好多意見我哋。我哋準備咗好多烈酒，陳經理教我哋斟酒嘅次序要點樣先夠禮貌，有啲酒又應該點用，因為新人真係唔識或者為意呢方面嘅事宜，我自己就連一張枱要用幾多支酒都唔知，但陳經理一早已經提醒咗我，好似個爸爸咁，所以真喺好多謝佢！！！

我同老公想要中式酒樓，之前睇過幾間，最後覺得美心價錢同食物質素會有保證，就決定係呢度擺酒。揀中環呢間嘅原因除左因為地點好，仲有因為樓底高同埋望到海景。而且中環美心自稱同其他美心唔同，係獨立經營，所以會比其他美心貴。 我地同經理傾過，見佢地嘅介紹有紋有路，所以就決定㨂佢地。不過有時係唔同嘅負責人，有啲態度就冇咁好。可能因為我地早一年book，佢地有同我講明下年會加價4-7%，要有心理準備到時要加錢，而最後加嘅錢都係within呢個range。但其他朋友同我講過，如果book酒店嘅話係會lock死果個價，邊日book就會邊個價，而唔會因為擺酒日期唔同而有分別。 我地擺左廿五圍，有人同我講侍應略略遜色，例如分餸同禮貌方面，不過主家席方面就冇乜問題，仲有啲人話餸偏咸，但我自己就覺得OK。佢應承俾我地嘅野都俾足哂，包括當時我地就要求主家席一定要分餸（本身佢話唔會提供），但同佢地傾完之後都有做俾我地。另外我地拎左啲酒，而酒樓方面亦有酒提供，我地要求主家席要用我地嘅酒，起初都有啲驚佢地會搞亂，但turn out係冇問題。 播片嘅時候其實我冇去睇，美心有專人負責影音方面，而我地都有搵兄弟負責同佢夾，咪同聲都唔錯，聽返成個過程好順利。