我係胡杏兒未用之前就已經confirm佢哋，嗰時我上網睇佢花球啲相覺得好靚，所以好快已經決定好。不過之後見佢網上大熱都有擔心過佢會質素下降，始終佢哋小本經營嘛！好在最後出到嚟個花球都係好靚好滿意。 其實訂花都無去見佢哋，只係send相去講我係鐘意佢網上嘅邊個花球款，最多只係講埋想少啲白色同多啲粉紅色。雖然落訂時見唔到面，但我有預先同佢哋講定我唔鐘意牡丹同埋多肉植物，所以就算見唔到個實物先都無問題。不過佢哋真係好忙，覆得會比較慢，都要自己主動啲去跟進。 我揀嘅花主要係馬蹄蘭，我覺得好靚，不過用呢種花真係比較易燶，就算佢哋已經用個小樽養住啲花，到夜晚啲邊已經黑黑地，但都仲係好靚嘅！ （我呢個價錢係包埋姊妹手花同所有長輩同兄弟要嘅襟花）

呢間舖頭本身係喺屯門，佢喺我哋呢區好出名。不過佢之後搬咗去荃灣，但因為佢質素太靚，所以我哋都覺得遠少少都冇問題。我哋首先喺facebook搵到佢，之後再用whatsapp嚟溝通。 你講完俾佢聽有咩idea，佢就會俾好多例子你睇，睇完之後到你真係揀花球嗰下，佢就會有張list俾你睇你想揀咩花種同顏色，即係佢會同你做個普查先，就返你個結果，你鍾意咩花咩款咩顏色，再砌一個你想要嘅花球出嚟，之後亦都可以再fine tune，係好tailor-made，砌到你鍾意為止。 我哋揀咗一個絲花花球，一個鮮花花球。鮮花就用咗蝴蝶蘭，garden rose，米拿蘇葉等等。其實佢俾咗好多學名我哋，同埋俾咗好多相我哋睇，我揀完都唔係好記得啲名，總之你揀咗係鍾意嗰個型態嘅花，你就算唔識得個名，你俾啲相佢佢就會話返俾你聽係咩，仲會影埋佢哋有個樣俾你睇，咁就一定唔會揀錯。 我哋whatsapp溝通，有時都會錄音，佢亦都會拍條片俾我哋睇哂成個花球嘅樣，教我哋點整，等我哋知道成個花球360度係點樣，佢連啲花點保養同點擺啲花都教哂我哋。我覺得溝通都好足夠，因為影哂相拍哂片。拎花就要去佢荃灣個店面，佢哋嘅花係養住，包埋花樽俾你，直到你用嗰日都養住佢，到你big day嗰日影相就拎出嚟，唔用就擺返入去，啲花就到夜晚都keep住新鮮！